Schumacher var með upptökuvél á hjálminum

Frönsk yfirvöld hafa staðfest að Michael Schumacher hafi verið með upptökuvél á hjálmi sínum þegar hann lenti í alvarlegu skíðaslysi í frönsku ölpunum fyrir rúmri viku síðan.

Franska sjónvarpsstöðin BFMTV hafði fullyrt þetta og þetta var svo staðfest á blaðamannafundi franskra yfirvalda í morgun. Þá var tilkynnt að rannsókn lögreglu á slysinu væri formlega lokið.

Á fundinum í morgun kom fram að Schumacher hafi fallið þegar hann lenti á grjóti sem var falið í snjónum. Við það hafi hann missti skíðin undan sér.

„Schumacher var mjög góður skíðamaður en hann fór utan brautar og rak annað skíðið sitt í stein. Hann féll og rak höfuðið í annan stein. Hann var níu metrum frá brautinni þegar hann féll,“ sagði saksóknarinn Patrick Quincy á blaðamannafundinum í morgun.

„Myndefnið úr vélinni á hjálmi hans var mjög gott og gaf mjög skýra mynd af því sem gerðist. Við getum notað efnið til að endurskapa atburðina.“

Hann mun ekki hafa verið á óeðlilegum hraða sem helst í hendur við það sem umboðsmaður Schumacher, Sabine Kehm, hefur áður sagt auk vitnisburði sjónarvotta.

„Við getum ekki fullyrt um hversu hratt hann fór en þegar hann fór utan brautarinnar sló hann ekki af. Hann var á eðlilegum hraða miðað við að hann var afar fær skíðamaður sem hafði farið utan brautar,“ sagði einn rannsóknaraðilinn að slysinu.

Rannsókn yfirvalda í Frakklandi beindist meðal annars að því hvort að rétt hafi verið staðið að merkingum á skíðaleiðum í brekkunni þar sem Schumacher var, auk þess hvort að búnaður hans hafi verið gallaður eða bilaður. Hins vegar leiddi rannsóknin ekkert óeðlilegt í ljós hvað þetta varðar.

Schumacher er enn haldið sofandi eftir slysið sem átti sér stað fyrir rúmri viku síðan. Hann hlaut alvarlega höfuðáverka og er enn talinn í lífshættu.