Hreiðar Már og Sigurður fara fram á frávísun

Hreiðar Már Sigurðsson, fyrrverandi forstjóri Kaupþings, og Sigurður Einarsson, fyrrverandi stjórnarformaður, krefjast frávísunar í máli sérstaks saksóknara gegn sér vegna meintrar markaðsmisnotkunar. Níu eru ákærðir í þessu máli og fóru sex þeirra fram á að málinu yrði vísað frá. Fyrirtaka í málinu fór fram í Héraðsdómi Reykjavíkur í dag.

Málið snýr að umfangsmikilli markaðsmisnotkun lykilstarfsmanna Kaupþings á tímabilinu 1. nóvember 2007 til 8. október 2008. Fram kemur í ákæru að brot ákærðu séu umfangsmikil, hafi verið þaulskipulögð, staðið yfir í langan tíma og varði gríðarlega háar fjárhæðir.

Ákærðu komu ýmist í veg fyrir eða hægðu á lækkun á verði hlutabréfa í Kaupþingi og juku seljanleika þeirra með kerfisbundnum og stórfelldum kaupum í krafti fjárhagslegs styrks bankans. Um 40% viðskipta með bréf Kaupþings í Kauphöll Íslands á þessu tímabili voru sýndarviðskipti. Einnig lagði Kaupþing erlendum félögum til háar upphæðir til að kaupa hluti í bankanum sem voru í raun að fullu fjármögnuð af bankanum sjálfum. Viðskiptin byggðust á blekkingum og sýndarmennsku.

Arngrímur Ísberg dómari spurði í Héraðsdómi í dag hvers vegna honum hefði ekki borist greinagerðir frá verjendum lykilsstjórnenda Kaupþings. Verjendurnir hafa haft sjö mánuði til að skila inn greinagerð frá því að ákæra sérstaks saksóknara var gefin en engin þeirra barst fyrir fyrirtöku í dag. Björn Þorvaldsson, saksóknari hjá sérstökum saksóknara, sagði í samtali við Vísi verjendurnir væru augljóslega að reyna að tefja málið.

Þeir sem ákærðir eru í málinu eru eftirfarandi: Hreiðar Már Sigurðsson, Sigurður Einarsson, Ingólfur Helgason, Einar Pálmi Sigmundsson, Birnir Sær Björnsson, Pétur Kristinn Guðmarsson, Magnús Guðmundsson, Bjarki H. Diego, og Björk Þórarinsdóttir. Allir kröfðust frávísunar að undanskildum þeim Einari Pálma, Pétur Kristni og Birni Sæ.

Málflutningur um frávísunarkröfur verður þann 27. janúar næstkomandi í Héraðsdómi Reykjavíkur.