Horfur í Langá góðar fyrir komandi sumur

Langá á Mýrum hefur undanfarin ár verið í flokki aflahæstu laxveiðiáa landsins og miðað við nýjar rannsóknir á seiðabúskap hennar er útlitið gott fyrir komandi ár.

Ný rannsókn Veiðimálastofnunar sýnir að horfurnar í ánni eru mjög góðar en þetta byggir á aukinni hrygningu í ánni en seiðaárgangar frá 2009 og 2010 eru með þeim sterkustu sem hafa mælst í ánni.  Lax úr þessum árgöngum verður ríkjandi í göngum sumarsins og þar sem seiðabúskapur skýrir um 40-50% veiðinnar benda allar upplýsingar til að gott sumar sé í vændum í ánni.  Veiðin 2013 endaði í 2815 löxum en áin hefði leikandi getað farið mun hærra en það ef miklir vatnavextir í lok tímabils hefðu ekki gert veiðimönnum erfitt fyrir.  Mesta veiðin var 2008 þegar áin fór í 2970 laxa og unnendur Langár eru þegar farnir að spá henni yfir 3000 laxa í sumar enda allar aðstæður til að svo verði þegar til staðar.  Nægur snjór er á hálendinu og staðan í vatnsbúskapnum því afar góð.

Veiðimálastofnun hefur unnið árlega að vöktun á laxastofni Langár frá árinu 1986 í samvinnu við veiðifélag Langár, en fyrstu rannsóknir í ánni voru gerðar 1975. Skýrsla stofnunarinnar er mjög fróðleg lesning fyrir veiðimenn en þar segir m.a.: „Seiðaþéttleiki mældist langt yfir meðaltali haustið 2013 og nýliðun seiða úr hrygningu 2012 mældist yfir meðallagi, þrátt fyrir niðursveiflu í laxgengd og veiði á árinu 2012. Uppistaða í laxveiðinni 2013 var klakárgangurinn frá 2009. Árgangar frá 2010 og 2011 hafa mælst svipaðir að styrkleika og er því útlit fyrir að áframhald geti orðið á góðri laxgengd og veiði næstu árin á vatnasvæði Langár.“ Þetta eru góðar fréttir fyrir unnendur Langár á Mýrum en skýrslu Veiðimálastofnunar í heild má nálgast hér að neðan.

Vöktunarrannsóknir á laxastofni Langár á Mýrum árið 2013.