Segir samningamennina hafa verið vonda

Fyrrverandi stjórnarmenn Glitnis báru í dag vitni símleiðis í Aurum-málinu svokallaða.

Allir voru þeir sammála um að þeir hefði ekki orðið varir við að Lárus Welding, fyrrverandi forstjóri Glitnis sem ákærður er í málinu, hefði verið beittur þrýstingur af stærstu hluthöfum bankans.

Einnig voru vitnin sammála um að bankinn hafi ekki tekið sérstakt tillit til hagsmuna stærstu hluthafa.

Í málinu eru þeir Lárus Welding, Jón Ásgeir Jóhannesson, fjárfestir, Magnús Arnar Arngrímsson og Bjarni Jóhannesson, sem báðir voru starfsmenn Glitnis, ákærðir fyrir umboðssvik vegna sex milljarða króna láns sem Glitnir veitti félaginu FS38 ehf. sem var í eigu Pálma Haraldssonar, vegna kaupa á félaginu Aurum Holdings Ltd.

Skarphéðin Berg Steinarsson, Þorsteinn Már Baldvinsson, Þorsteinn M. Jónsson, Pétur Guðmundsson og Einar Sveinsson gáfu meðal annarra skýrslu í dag og voru þeir allir stjórnarmenn Glitnis á einhverjum tímapunkti á árunum 2007 til 2008.

Þeir fengu allir mjög svipaðar spurningar og svöruðu þeim á svipaðan hátt.

Fram kom í vitnisburði Péturs Guðmundssonar, sem var að sögn óháður í stjórn Glitnis, að hann hafi látið undan þrýstingi þegar hann samþykkti starfslokasamning Bjarna Ármannssonar fyrrverandi forstjóra Glitnis og ráðningarsamning Lárusar.

„Það var eftir því leitað að ég tæki sæti í stjórn sem óháður stjórnarmaður,“ sagði Pétur í Héraðsdómi Reykjavíkur í dag: „Hannes Smárason talaði við mig og fékk mig í verkefnið en það var beinlínis tekið fram að ef það kæmi mótframboð þá yrði ég ekki studdur af neinum hluthöfum.“

Hann sagði að sér hefði fundist samningarnir við forstjórana tvo háir: „Á mínum fyrsta stjórnarfundi voru lagðir fram samningar við Bjarna Ármannsson og Lárus Welding og mér þótti þeir nokkuð háir. Ég ákvað að gera athugasemd við þá en umræðan á stjórnarfundunum var sú að þeir yrðu samþykktir. Ég hugsaði með mér að sitja hjá en lét undan því að taka afstöðu. Það voru vondir samningamenn sem gerðu þessa samninga.“

Einar Sveinsson var spurður hvort hann hefði orðið var við breyttar áherslur í rekstri bankans við innkomu nýrra eigenda og svaraði hann því játandi: „Mér sýndist útlán bankans aukast umtalsvert.“

Einar var stjórnarformaður bankans til 30. apríl 2007.