Laxinn mættur í fleiri ár

Laxinn er mættur í fleiri ár og meðal þeirra laxveiðiáa sem staðfest er að laxar hafi sýnt sig eru meðal annars Miðfjarðará, Víðidalsá, Grímsá og Korpa.

Í Korpu lágu greinilega laxar í Berghylnum og var einn af þeim mjög vænn tveggja ára lax en það þykir frekar sjaldgæf sjón í henni.  Veiðimenn eru almennt að vona að þessi fyrirboði í snemmgengnum löxum, þá sérstaklega í ánum fyrir norðan, viti á gott sumar þar sem laxarnir virðast koma vel haldnir úr sjó og undantekningalaust virðast þetta vera vænir tveggja ára laxar.  Það styttist í stóra júní strauminn en samhliða honum koma oft mjög kraftmiklar göngur í árnar á vesturlandi og má segja að með þeim göngum hefjist tímabil í ánum sem einkennist af mikilli veiði.  Vatnið er sérstaklega gott í ánum og mikil snjóalög, þá sérstaklega fyrir norðan og austan, gætu tryggt að árnar haldi sér í góðu vatni langt inní sumar þó að úrkoma verði í lágmarki.  Veiðimenn vonast annars eftir því að jafnvægi verði í sólardögum og úrkomudögum svo árnar verði góðar í allt sumar.  Mikið ringdi í lok tímabils í fyrra sem gerði það að verkum af margar árnar voru meira og minna í flóði síðustu tvær vikurnar af tímabilinu.