Frábær opnun í Hrútafjarðará

Hrútafjarðará opnaði 1. júlí og eins og  flestar árnar á norðurlandi var opnunin með allra besta móti sem gefur veiðimönnum von um gott sumar í ánni.

Fyrsti laxinn kom úr Hólmahyl sem er neðarlega í ánni á "hitch" túpu sem er líklega að verða ein vinsælasta veiðiaðferðin á landinu í dag.  Alls komu 5 laxar á land fyrir hádegi að sögn Þrastar Elliðasonar leigutaka en áin var ansi vatnsmikil á fyrsta degi.  Allir laxarnir voru tveggjá ára laxar og sá stærsti var 88 sm.  Alls veiddust 8 laxar á þessum fyrsta degi sem er frábær opnun í ánni en auk þeirra veiðistaða sem gáfu lax sáust laxar í  Stokknum, Surt og Brúarhyl en fyrir utan að sjá laxa víða í ánni vakti það athygli veiðimanna að þeir laxar sem veiddust ofarlega voru ekki lúsugir og hafa greinilega verið í ánni í nokkurn tíma.