Veiðin í Laxá í Ásum heldur áfram að vera frábær

Það er engin laxveiðiá á Íslandi sem nær því að skáka Laxá í Ásum við hvað varðar fjölda laxa á stöng.

Tölfræðin úr ánni er stundum eins og draumur hvers veiðimanns og þannig hefur því verið lýst að veiða í ánni þessa dagana, eins og draumi.  Síðasta 3 daga holl  landaði 70 löxum og samtals hafa veiðst 219 laxar síðustu 9 daga sem er frábær veiði á aðeins tvær stangir.  Takan fór á yfirsnúning í gær og þar sem það er lax í öllum hyljum hefur vafalítið verið mikið fjör við bakkann.  Samtals eru komnir 589 laxar á land þegar 45 dagar eru liðnir af veiðitímanum sem gerir meðalveiði upp á 6.5 laxa á stöng á dag.  Ágúst hefur oft gefið feyknagóða veiði í ánni og ef veiðin heldur sama takti verður ekki langt í að þessi litla skemmtilega á fari yfir 1000 laxa.