Litlar breytingar milli vikutalna í laxveiðiánum

Núna styttist í að árnar sem opnuðu fyrstar loki fyrir veiðimenn og þá fara fyrstu lokatölurnar að liggja fyrir á þessu ári sem gárungarnir eru farnir að kalla "Ár án allra meta"

Árið var dapurt hvað varðar göngur á eins árs laxi og er þetta annað árið af þremur sem þetta gerist.  Margar kenningar eru á lofti um ástæður sem hér gætu legið að baki en því miður verður ekki hægt að sjá hvernig þetta ár var í heildina fyrr en seiðin úr þessari göngu fara að skila sér í árnar en það er í fyrsta lagi 2019 á þeim seiðum sem dvelja 3 ár í ánni og 1 ár í sjó.  

Eystri Rangá heldur toppsætinu þessa vikuna en Ytri Rangá gæti sótt hart að henni þegar maðkveiðin byrjar í henni um miðjan mánuðinn en þá taka veiðitölurnar gjarnan stóran kipp.  Nú dettur sá tími líka í garð að innlendir veiðimenn verða fjölmennari við bakkana og þeir þekkja árnar yfirleitt betur er erlendu veiðimennirnir sem skilar sér í hærri veiðitölum, oftast nær.

Höfum það líka hugfast þegar við skoðum þessar tölur frá núverandi veiðisumri og förum að bera þær saman við sumarið 2013 að það sumar var metár.  Það er mikið nær að taka meðaltal síðustu 10 ára og finna úr hvernig samdráttur á veiðinni var í sumar.  Topp 10 listinn er hér fyrir neðan en listann í heild sinni má finna á www.angling.is

Veiðivatn	Dagsetning	Heildarveiði	Stangafjöldi	Lokatölur 2013
Eystri-Rangá	3. 9. 2014	2146	18	4797
Blanda	3. 9. 2014	1899	14	2611
Ytri-Rangá & Hólsá, vesturbakki.	3. 9. 2014	1886	20	5461
Miðfjarðará	3. 9. 2014	1401	10	3667
Þverá + Kjarará	3. 9. 2014	1090	14	3373
Selá í Vopnafirði	3. 9. 2014	887	7	1664
Laxá á Ásum	3. 9. 2014	886	2	1062
Norðurá	3. 9. 2014	874	15	3351
Laxá í Aðaldal	3. 9. 2014	767	18	1009
Haffjarðará	3. 9. 2014	754	6	2158