Lokatölur úr laxveiðiánum

Þá liggja fyrir lokatölur úr laxveiðiánum eftir þetta sumarið að undanskildum ánum sem byggja veiði á seiðasleppingum en í þeim er veitt til 20. október.

Veiðisumarið 2014 fer í bækurnar sem eitt það lakasta í heildarveiði þrátt fyrir að margar árnar á norðurlandi hafi átt góðu gengi að fagna.  Veiðin var sýnu verst á vesturlandi og nokkrar ár þar til að mynda Langá, Hítará, Grímsá, Laxá í Kjós, Álftá, Andakílsá, Norðurá, Laxá í Dölum og nokkrar til viðbótar hafi átt sín lélegustu ár frá 1975 þegar núverandi form veiðiskráninga hófst.  Ef listinn er skoðaður eru samanburðartölurnar frá metsumrinu 2013 og gefa þess vegna ekki alveg rétta mynd af niðursveiflunni.  Laxá á Ásum, Blanda og Miðfjarðará eru til að mynda að skila góðri veiði í sumar og þar á bæ var meira af tveggja ára laxi en í meðalári.  60-70% hlutfall tveggja ára laxa er til að mynda ekki óalgengt í veiðibókumá norðurlandi og sama var upp í Þverá og Kjarrá.  Það stefnir í að það verði aðeins ein á sem á möguleika á að fara í 3000 laxa og það er Ytri Rangá en veiðin í henni síðustu daga hefur verið ágæt og dæmi um að veiðimenn fari heim með 10 laxa eftir daginn sem er þó farinn að styttast vel vegna sólarleysis.  Topp 10 listinn er hér fyrir neðan og listann í heild sinni má finna á www.angling.is

Veiðivatn	Dagsetning	Heildarveiði	Stangir	Veiði 2013
Ytri-Rangá & Hólsá, vesturbakki.	9. 10. 2014	2905	20	5461
Eystri-Rangá	8. 10. 2014	2479	18	4797
Blanda	1. 10. 2014	Lokatölur 1931	14	2611
Miðfjarðará	1. 10. 2014	Lokatölur 1694	10	3667
Þverá + Kjarará	17. 9. 2014	Lokatölur 1195	14	3373
Laxá á Ásum	24. 9. 2014	Lokatölur 1006	2	1062
Selá í Vopnafirði	1. 10. 2014	Lokatölur 1004	7	1664
Norðurá	17. 9. 2014	Lokatölur 924	15	3351
Stóra-Laxá	1. 10. 2014	Lokatölur 882	10	1776
Laxá í Aðaldal	1. 10. 2014	Lokatölur 849	18	1009