Arnór: Sumir of fljótir að afskrifa Seattle

„Við horfðum margir á leikinn saman eftir að við komum upp á hótel í gær. Það var gaman,“ sagði Arnór Atlason í samtali við Vísi á Hilton-hótelinu hér í Doha í dag.

Nokkrir úr landsliðshópnum voru þá enn að nudda stírurnar úr augunum eftir að hafa vakið eftir leik Seattle Seahawks gegn Green Bay Packers í úrslitum NFC-deildarinnar í NFL-boltanum í nótt. Leiknum var lokið laust fyrir klukkan þrjú í nótt.

„Sumir fóru reyndar aðeins of snemma að sofa. Þeir voru of fljótir að afskrifa [Seattle],“ sagði hann en Seattle vann í framlengingu eftir að hafa verið undir langstærsta hluta leiksins.

„Þeir verða bara að eiga það við sjálfa sig. En það var gaman að krydda þetta aðeins hjá okkur og við fengum að sofa út í morgun sem var gott.“

Strákarnir voru vitaskuld glaðir eftir sigurinn á Alsíringum í gær. „Hann létti aðeins á okkur og það var léttara að vakna í morgun en eftir Svíaleikinn. En það er nóg eftir og mikið verk óunnið ef við ætlum okkur að ná markmiðum okkar.“

Næst á dagskrá er leikur gegn Frakklandi en hann fer fram á morgun. Arnór, sem leikur með St. Raphael þar í landi, segir það ávallt gaman að mæta þeim löndum þar sem hann býr.

„Það hefur bara gerst svo oft í gegnum tíðina og hefur því engin áhrif á mann lengur. En það verður gaman að mæta Frökkum. Þetta eru þeir bestu og við viljum mæla okkur við þessi lið. Það verður gaman að sjá hvernig við stöndum.“

Viðtalið við Arnór má heyra í heild sinni efst í fréttinni.

Ekki missa af neinu sem gerist á HM. Fylgdu Vísi á Twitter, Facebook og Snapchat (notendanafn: sport365).