Heiðar Már heldur kröfu um gjaldþrotaskipti yfir Kaupþingi til streitu

Heiðar Már Guðjónsson fjárfestir hyggst halda til streitu kröfu sinni um að slitameðferð yfir Kaupþingi ljúki með gjaldþrotaskiptum þrátt fyrir að nauðsamningar við kröfuhafa föllnu bankanna séu langt komnir.

Fyrirtaka í málinu fyrir Hérðasdómi Reykjavíkur hefur verið boðuð 24. júní næstkomandi. Heiðar Már á von á því að Kaupþing muni þá fara fram á að málinu verði vísað frá dómi þar sem viðræður um nauðasamningar standi yfir. Hvernig málið fari að lokum velti á því hvort dómari telji að nauðasamningar séu líklegir til að takast og standast lög.

„Mér finnst langt eðlilegast að þetta fari í þrot en það er spurning hvað dómari segir þegar stjórnvöld eru nánast búin að samþykkja nauðasamninga,“ segir Heiðar Már.



Telur hagsmunum Íslands betur borgið með dómstólaleiðinni

Fallist dómari ekki á frávísunarkröfu Kaupþings er búist við því að aðalmeðferð í málinu fari fram næsta haust að því gefnu að ekki búið að ljúka nauðasamningum fyrir þann tíma.

Heiðar Már bendir á að í Icesave málinu hafi verið deilt um hvort fara ætti dómstólaleiðina eða samningaleiðina. „Mér finnst algjörlega skýrt í þessu að okkar hagsmunum er mun betur borgið að fara með þetta eftir lögum og í gegnum dómstólana frekar en að vera með einhverja samninga fram hjá lögum,“ segir hann.

Gagnrýnir forgangsröðun stjórnvalda

Þá gagnrýnir fjárfestirinn einnig forgangsröðun stjórnvalda við afléttingu gjaldeyrishafta.

„Það sem mér finnst vont við þessa nauðasamninga er að það er verið að hleypa útlendingunum út með allt sitt. Það er verið að hleypa útlendingunum út með 2000 milljarða og svo er verið að tala um að kannski fái lífeyrissjóðirnir að fjárfesta fyrir tíu milljarða. Þetta er algjörlega að hafa endaskipti á hlutunum.“

Þannig að þér finnst að innlendir aðilar ættu að ganga fyrir?

„Að sjálfsögðu, ég hefði einhvern veginn ímyndað mér að ríkisstjórnin væri kosin af þeim.“