Litla Ísland minnir á sig

Það kryddar óneitanlega tilveruna þegar fulltrúar Íslands slá í gegn á alþjóðlegum vettvangi. Ekki líða margir dagar á milli þess sem maður fyllist stolti vegna árangurs samlanda. Tökum bara síðustu tvær vikur sem dæmi.

Sunddrottningarnar Eygló Ósk Gústavsdóttir og Hrafnhildur Lúthersdóttir fóru á kostum á HM í Rússlandi. Sögulegur árangur, Íslandsmet og Norðurlandamet - já bara metaregn. Í gær var Anítu Hinriksdóttur boðið á HM í frjálsum í Kína þökk sé glæsilegum árangri undanfarin misseri. Ásdís Hjálmsdóttir verður einnig á meðal keppenda í spjótkasti þar sem hún hefur verið fastagestur undanfarin ár.

Krossfitdrottningin Katrín Tanja Davíðsdóttir er sú hraustasta í heimi og ekki langt undan eru Björgvin Guðmundsson og Sara Sigmundsdóttir. Fanney Hauksdóttir heldur áfram að gera fólk orðlaust, nú með Evrópumeistaratitli í bekkpressu - hennar fyrsta alþjóðlega móti í fullorðinsflokki. Haraldur Franklín spilaði svo frábært golf á EM áhugamanna í Slóvakíu.

Gylfi Sigurðsson og félagar í Swansea stríddu Chelsea um helgina, Alfreð Finnbogason skoraði sínum fyrsta leik í Grikklandi og Aron Jóhannsson, víst Íslendingur, samdi við eitt stærsta félag í Þýskalandi. Aron Pálmarsson vann sinn fyrsta titil með Veszprém og Aronar framtíðarinnar í 19 ára landsliði karla hafa unnið alla þrjá leikina á HM í Rússlandi. Þá hafa íslenskir knapar sópað að sér verðlaunum á HM íslenska hestsins í Herning.

Framundan eru stór augnablik í íslenskri íþróttasögu. Karlalandsliðið í fótbolta getur stigið risaskref í átt að sínu fyrsta stórmóti með góðum úrslitum í leikjum sínum gegn Hollandi og Kasakstan Strákarnir í körfuboltalandsliðinu halda svo til Berlínar í september og mæta þeim bestu í Evrópu á EM í fyrsta skipti. Þar ætla ég að vera og kæmi mér mjög á óvart ef ég sneri ekki heim rosalega stoltur af strákunum.