Förðunin á tískuvikunni í New York

Tískuvikan í New York er í fullum gangi, en henni lýkur á fimmtudag. Glamour kíkti á förðunina á pöllunum fyrir næsta sumar á fyrstu tveimur dögum tískuvikunnar. 

Þar mátti sjá allt frá næstum alveg óförðuðum fyrirsætum upp í andlit sem var þakið skrauti. En sjón er sögu ríkari.

Förðunarmeistarinn Pat McGrath gerði tvennskonar farðanir fyrir sýningu Givenchy. Annars vegar nokkuð látlausa, en töffaralega förðun þar sem hún hafði aflitað brúnirnar og rammað augun inn með möttum, korklituðum augnskugga.

Hinsvegar var það förðun þar sem andlitsskrautið var aftur í aðalhlutverki. Nú voru litirnir ljósir og mildir en skrautið þeim mun meira.

Förðunarmeistari Maybelline, Yadim Carraza, sagðist hafa fengið eina ósk frá fatahönnuðinum Jason Wu: Rauðar varir!

Carraza tók hann á orðinu og var rauður varalitur það eina sem notað var á fyrirsæturnar. Enginn farði, enginn augnhárabrettari, enginn maskari, enginn hyljari. Ekkert.

Á varirnar var notaður nýr mattur varalitur sem væntanlegur er frá Maybelline, en hann er svo nýr að ekki er komið nafn á hann ennþá. Rétt áður en fyrirsæturnar gengu pallana var rauðu duft litarefni, sem notað er í varalitina, dúmpað á varirnar til að gefa extra matta flauelsáferð. 

Förðunin á Sýningu Alexander Wang var látlaus og náttúruleg þar sem falleg húð fékk að njóta sín. Ekkert nýtt þannig séð, en virkar alltaf. 

Á sýningu Rodebjer var „contouring“ tekið alla leið. Förðun sem maður hefði haldið (og kannski vonað) að væri á leiðinni út. Mestu vonbrigðin til þessa. 

Í dag verður nóg af góðum sýningum sem vert er að fylgjst með. Victoria Beckham, Derek Lam, Thakoon, Diane Von Furstenberg, Prabal Gurung og Opening Ceremony.

Nýtt Glamour er komið í allar helstu verslanir - tryggðu þér eintak!



Fylgstu með Glamour á Instagram og á Facebook.