Stjórnarformaður Stím sinnti skyldum sínum „örugglega ekki vel“

Jakob Valgeir Flosason, sem var stjórnarformaður eignarhaldsfélagsins Stím, kom fyrir Héraðsdóm Reykjavíkur í dag í sakamáli sem kennt er við félagið. Hann var einn af hluthöfum félagsins og kvaðst fyrir dómi í dag hafa lagt 150 milljónir króna í Stím sem hann tapaði öllum.

Í málinu er Lárus Welding, fyrrverandi forstjóri Glitnis ákærður fyrir umboðssvik vegna 20 milljarða króna lánveitingarinnar til Stím en peningarnir voru notaðir til að kaupa hlutabréf af Glitni í bankanum sjálfum og FL Group.

Þá eru einnig ákærðir þeir Jóhannes Baldursson, fyrrverandi framkvæmdastjóri markaðsviðskipta Glitnis, og Þorvaldur Lúðvík Sigurjónsson, fyrrverandi forstjóri Sögu Capital, vegna kaupa eins fagfjárfestasjóðs Glitnis á skuldabréfi sem útgefið var af Stím og var í eigu Sögu.

Magnús Pálmi hringdi í Jakob út af Stím

Hólmsteinn Gauti Sigurðsson, saksóknari, spurði Jakob Valgeir hver hefði kynnt Stím-viðskiptin fyrir honum. Svaraði hann því til að Magnús Pálmi Örnólfsson,  æskuvinur hans sem var yfirmaður eigin viðskipta Glitnis og er lykilvitni í málinu, hefði hringt í hann árið 2007 og sagt honum frá viðskiptunum.

Stærsti eigandi Stím var Glitnir með 32,5 prósent eignarhlut en sjálfur átti Jakob Valgeir 2,5 prósent hlut. Þá átti eignarhaldsfélagið Ofjarl, sem var í eigu hans og Ástmars Ingvarssonar 10 prósent í Stím.

Eins og áður segir var Jakob stjórnarformaður félagsins. Saksóknari spurði hann hvernig hann hefði sinnt skyldum sínum sem slíkur.

„Ég sinnti þeim örugglega ekki vel,“ svaraði Jakob. Hann var þá spurður hver hefði tekið ákvarðanir varðandi Stím en kvaðst eiginlega ekki vita það. Þá sagðist hann ekki vita hver hafi stjórnað félaginu í raun og veru. 

Eina ákvörðunin vegna hlutafjárútboðs FL

Aðspurður hvort að eina ákvörðunin sem hann sjálfur hefði tekið varðandi Stím var þátttaka félagsins í hlutafjárútboði FL Group í desember 2007. Í janúar 2008 lánaði Glitnir félaginu rúmlega 700 milljónir króna svo hægt yrði að borga fyrir hlutabréfin sem Stím hafði skuldbundið sig til að kaupa.

Jakob sagðist örugglega hafa rætt þátttökuna í hlutafjárútboðinu við einhvern hjá Glitni en mundi ekki hvern. Þá mundi hann heldur ekki hvort að vilyrði frá Glitni um fjármögnun fyrir hlutabréfunum hefði legið fyrir.

Reimar Pétursson, verjandi Jóhannesar Baldurssonar, spurði Jakob nánar út í tengsl hans við Magnús Pálma og kom þá fram að þeir hafi alist upp saman í Bolungarvík. Þá kvaðst Jakob hafa byrjaði í gjaldeyrisviðskiptum við Magnús Pálma í kringum 2000.

Reimar spurði hann þá hvort eitthvað hafi verið óeðlilegt í þeim samskiptum. Svaraði Jakob því neitandi en verjandinn gekk þá á hann og spurði hvort það væri ekkert sem hann myndi vilja greina dóminum frá.

Aftur svaraði Jakob neitandi og kannaðist heldur ekki við að hafa átt í viðskiptum við Magnús Pálma eftir að hann hætti störfum hjá Glitni.