Kröfuhafar samþykktu skilyrðin á ögurstundu

Aðeins nokkrum mínútum áður en forystumenn ríkisstjórnarinnar kynntu aðgerðaáætlun um afnám hafta sendu slitabúin frá sér erindi þar sem þau féllust á stöðugleikaskilyrðin. Eitt slitabúið, Kaupþing, sendi erindi frá sér daginn áður.

Sigurður Hannesson, varaformaður framkvæmdahóps um afnám hafta, segir að þetta sé til marks um það hve nauðsynlegt sé að skilyrðin sem sett eru fyrir nauðasamningunum séu aðhaldssöm. „Einhver gæti sagt að fyrst bréfin væru komin þá þyrfti nú ekki að fara með þennan stöðugleikaskatt fyrir þingið, en ef það verður ekki gert þá held ég að málið gæti tafist verulega. Þá vantar aðhaldið.“

Sigurður telur raunhæft að gera ráð fyrir að tekjur ríkisins verði 500-700 milljarðar. En vegna þess að stöðugleikaskilyrðin eru háð þróun á virði eigna verði tíminn að leiða í ljós hversu mikið þetta verður. Verði upphæðin lægri séu það í sjálfu sér góðar fréttir vegna þess að það þýði að vandinn sé þá minni en áður var talið.

Fullyrðingar stjórnarandstöðu ekki réttar

„Ef það verður meira þá er það náttúrlega gott fyrir ríkissjóð, en þá þýðir það líka að vandinn var stærri en við héldum. Þannig að við náum miklu betur að finna jafnvægi á milli vandamálsins og lausnarinnar,“ segir Sigurður.

Þingmenn stjórnarandstöðunnar hafa fullyrt að aðgerðaáætlun byggi á áætlun sem var gerð árið 2011, í tíð fyrri ríkisstjórnar. Sigurður segir þetta ekki rétt og að í þeirri vinnu hafi ekkert verið minnst á slitabúin.

„Auðvitað er maður bara stoltur af því að margir vilji eigna sér þetta. En í grunninn er þetta þannig að ef það væri til handbók um afnám hafta og stýringu á flæði, þá væru tvö atriði í henni. Það er það sem kemur fram í skýrslu fjármálaráðherra í mars, annars vegar afskriftir og hins vegar lenging.“