Finnur Orri um Pirlo: Gæðin leka af þessum töffara

Finnur Orri Margeirsson, miðjumaður KR, segir að það hafi verið áhugavert að kljást við ítölsku goðsögnina Andrea Pirlo í leik KR og New York City í nótt.

Þetta var síðasti leikur KR á þessu sterka æfingarmóti en ásamt KR voru New York City, FC Cincinatti og HB Köge þátttakendur.

Verkefnið var að einhverju leyti auðveldara fyrir miðjumenn KR-inga þegar kom í ljós að Frank Lampard yrði ekki með en þeir fengu þess í stað að kljást við Andrea Pirlo, fyrrum miðjumann Juventus, AC og Inter Milan og ítalska landsliðsins.

„Hef fengið auðveldari verkefni en að ná af honum boltanum, gæðin leka af þessum töffara! En virkilega gaman að spila þennan leik,“ sagði Finnur Orri á Twitter-síðu sinni eftir leikinn.

@VisirSport Hef fengið auðveldari verkefni en að ná af honum boltanum, gæðin leka af þessum töffara! En virkilega gaman að spila þennan leik

— Finnur Margeirsson (@Finnurorri) February 28, 2016