„Ertu með mig á heilanum?“ | Höddi Magg fer á kostum í auglýsingu fyrir Pepsi-mörkin

Hörður Magnússon fer á kostum í nýrri auglýsingu fyrir Pepsi-mörkin sem hefjast 28. apríl með árlegum upphitunarþætti fyrir sumarið. Hörður hefur stýrt „Pepsi-markaskútunni“ undanfarin fimm ár og hún siglir ekki í strand á hans vakt.

Hörður, eða „yours truly“, verður maðurinn á bakvið Pepsi-mörkin í sumar og þarf að stýra mönnum á borð við Hjörvari Hafliðasyni, Arnari Gunnlaugssyni og nýja manninum Ólafi Kristjánssyni.

Í auglýsingunni kemur Hörður inn á samfélagsmiðla sem eru orðnir stór hluti af knattspyrnusumrinu og þar er fólk stundum að skjóta á skipstjórann. Hödda er nú alveg sama hvað er sagt við hann.

Þrátt fyrir það gerði Hörður sér ferð upp á Skaga til að ræða aðeins við Garðar Gunnlaugsson sem vill fara að fá nýjan mann í Pepsi-markabrúna.

Það var nú ekki í fyrsta skipti sem þeir eigast við en 2012 fór Garðar ófögrum orðum um Hörð á Facebook og sagði meðal annars að „kókómjólk læki út um rassgatið á honum.“

Hörður átti eitthvað órætt við Garðar eins og sést í þessari bráðfyndnu auglýsingu.