„Það sem hræðir mann er það sem er mest þess virði að gera“

Anníe Mist segir að það sé ekki auðvelt að gefa svona mikið af sér í bók sem þessari en hún skrifaði um nýju bókina sína á samfélagsmiðlum sínum.

Anníe Mist á að baki magnaðan CrossFit-feril og er ein af stærstu stjörnunum í sögu íþróttarinnar en hún var fyrsta konan til að verða tvisvar heimsmeistari.

Hún hefur gengið í gegnum hæðir og lægðir á löngum og farsælum ferli og það er því af nægu að taka fyrir bókarskrif eins og þessi.

„Það er frekar óþægilegt að skrifa um erfiðustu stundir lífsins. Ég er CrossFit Games-keppandi til margra ára, svo ég hef nokkra reynslu af því. En að vera heiðarlegur um veikleika sína, mistök, blindu blettina og slæmar ákvarðanir er allt annars konar varnarleysi. Hluti af mér er svo stressaður yfir því að bókin mín, „Iceland Annie“, komi út í næsta mánuði! En keppnismanneskjan í mér veit að það er af hinu góða,“ skrifar Anníe Mist.

„Ef það er eitthvað sem ég hef lært á síðustu 15 árum, þá er það að það sem hræðir mann er það sem er mest þess virði að gera. Þægindi skila sjaldan eftirminnilegum verkum,“ skrifar Anníe

Iceland Annie-bókin kemur út 7. júlí og það eru eflaust margir aðdáendur íslensku goðsagnarinnar sem bíða spenntir eftir að fá að skyggnast á bak við tjöldin. Anníe vann bókina með Christine Jeffries.