Íslenski boltinn

Uppbótartíminn: Draumabyrjun Ólsara | Myndbönd

Ólsarar hafa byrjað tímabilið frábærlega.
Ólsarar hafa byrjað tímabilið frábærlega. vísir/vilhelm
Önnur umferð Pepsi-deildar karla 2016 í knattspyrnu kláraðist í gær. Hverjir áttu góðan dag og hverjir áttu erfiðan dag? Hvað segir tölfræðin og hver var umræðan á Twitter? Vísir gerir hér upp umferðina á léttum nótum.

Fjölnir, FH, Stjarnan og Víkingur Ólafsvík eru öll með fullt hús stiga eftir tvo sigra í fyrstu tveimur umferðunum. KR náði aðeins jafntefli gegn nýliðum Þróttar og eru án sigurs. Blikar náðu í sín fyrstu stig gegn Fylki sem er án stiga líkt og ÍA og Valur.

Umfjöllun og viðtöl úr öllum sex leikjum umferðarinnar:

Fjölnir 2-0 ÍBV

Víkingur Ó. 2-1 Valur

Fylkir 1-2 Breiðablik

FH 2-1 ÍA

Þróttur 2-2 KR

Víkingur 1-2 Stjarnan

Ágúst er ekki orðinn milljónamæringur.vísir/pjetur
Góð umferð fyrir ...

... Atla Viðar Björnsson

Dalvíkingurinn þarf ekki langan tíma til að skora og sýndi það enn og aftur gegn ÍA í Krikanum. Atli Viðar kom inn á í stöðunni 1-1 þegar fimm mínútur voru eftir. Og tveimur mínútum síðar lá boltinn í netinu. Atli Viðar skoraði einnig í síðustu umferð gegn Þrótti eftir að hafa komið inn á sem varamaður og mörkin í efstu deild eru því alls orðin 108.

... Ólsara

Víkingar unnu þrjá leiki af 22 þegar þeir voru í Pepsi-deildinni fyrir þremur árum. Eftir tvær umferðir í ár vantar Ólsara aðeins einn sigur til að jafna sigurfjöldann frá 2013. Lærisveinar Ejubs Purusevic eru greinilega reynslunni ríkari eftir dvölina í Pepsi-deildinni síðast og hafa litið vel út í fyrstu tveimur umferðunum. Króatinn Hrvoje Tokic skoraði bæði mörkin gegn og Val og er því kominn með 14 mörk í 10 deildarleikjum fyrir Víking.

... Ágúst Gylfason

Fjölnismenn hafa unnið báða leiki sína og erlendu leikmennirnir sem voru fengnir fyrir tímabilið virðast smellpassa inn í liðið. „Ég væri orðinn milljónamæringur ef þetta væri eitthvað lottó hjá okkur. Við leggjum mikla vinnu í leikmennina sem við fáum. Þetta eru vel valdir leikmenn og eru að sýna það í fyrstu tveimur leikjunum að þetta var ekkert lottó,“ sagði Ágúst Gylfason, þjálfari Fjölnis, eftir sigurinn á ÍBV. Ágúst og hans aðstoðarmenn hafa greinilega unnið heimavinnuna sína vel og það er að skila sér.

KR-ingar fara rólega af stað.vísir/ernir
Erfið umferð fyrir ...

... Valsmenn

Lærisveinar Ólafs Jóhannessonar spiluðu vel á undirbúningstímabilinu en eru stigalausir eftir fyrstu tvær umferðirnar í Pepsi-deildinni. Skelfileg byrjun hjá bikarmeisturunum og ekki bætti úr skák að Ingvar Þór Kale þurfti að fara af velli vegna meiðsla eftir að hafa gefið mark. Í stað hans kom hinn 16 ára gamli Jón Freyr Eyþórsson sem leið heldur ekki vel út í sigurmarki Ólsara. Valsmenn þurfa að girða sig í brók ætli þeir sér að vera með í toppbaráttunni í sumar.

... Bjarna Guðjónsson

Það var mikil pressa á Bjarna fyrir tímabilið og hún hefur ekki minnkað eftir rýra uppskeru KR-inga í fyrstu tveimur umferðunum. KR varð að sætta sig við eitt stig gegn nýliðum Þróttar í gær og er þegar lent fjórum stigum á eftir FH og Stjörnunni. FH-ingar eru einmitt næstu mótherjar KR-inga en það verður gríðarlega mikið undir í þeim leik og Vesturbæingar mega engan veginn við tapi.

... Valdimar Pálsson

Valdimar sá um dómgæsluna í leik FH og ÍA í Krikanum og stóð sig að mörgu leyti ágætlega. Hann rak Steven Lennon réttilega af velli fyrir gróft brot en gerði stór mistök í aðdraganda jöfnunarmarks Skagamanna. Þórður Þorsteinn Þórðarson átti þá háa sendingu inn á teiginn, Gunnar Nielsen kom út úr markinu en missti af boltanum sem fór svo í höndina á Jóni Vilhelm Ákasyni áður en hann skoraði. Augljós hendi en Valdimar dæmdi ekki neitt.

Stjörnumenn eru með fullt hús stiga.vísir/ernir
Tölfræðin og sagan:

*Í þriðja sinn á síðustu fimm tímabilum Fjölnis í Pepsi-deildinni er Garfarvogsliðið með fullt hús eftir tvær umferðir.

*Fjölnisliðið hefur unnið 5 af 6 heimaleikjum sínum í Pepsi-deildinni með Daniel Ivanovski í vörninni, fengið 16 af 18 stigum í boði og aðeins fengið á sig eitt mark.

*ÍBV hefur aðeins unnið 1 af síðustu 15 Pepsi-deildarleikjum liðsins utan Vestmannaeyja (1 sigur, 2 jafntefli, 12 töp).

*Fyrsta sinn í tíu ár sem Valsmenn tapa fyrstu tveimur leikjum sínum á Íslandsmótinu en þeir töpuðu á móti Breiðabliki (1-2) og FH (0-2) í fyrstu tveimur umferðunum 2006.

*Víkingsliðið var undir í 158 mínútur í fyrstu tveimur leikjunum 2013 en liðið hefur ekki enn lent undir á fyrstu 180 mínútunum í Pepsi-deildinni 2016.

*Ólafur Jóhannesson hefur ekki náð að stýra Val til sigurs í fyrstu tveimur umferðunum fyrstu tvö tímabil sín á Hlíðarenda (1 jafntefli, 3 töp) en FH vann 7 af 10 leikjum undir hans stjórn í fyrstu tveimur umferðunum 2003 til 2007 (2 jafntefli, 1 tap).

*Bjarni Guðjónsson hefur enn ekki náð að fagna sigri sem þjálfari í fyrstu tveimur umferðunum Pepsi-deildarinnar með Fram 2014 og KR 2015 og 2016 (4 jafntefli, 2 töp).

*Fyrsta sinn í 32 ár sem Þróttur nær í stig á heimavelli á móti KR í efstu deild.

*Þróttur var síðast ekki í fallsæti eftir tvær umferðir í úrvalsdeildinni sumarið 2005.

*Atli Viðar Björnsson hefur skorað 4 mörk í 3 leikjum á móti ÍA í Pepsi-deildinni undanfarin tvö tímabil.

*FH-ingar hafa unnið 6 deildarleiki í röð í Kaplakrika, fimm síðustu í fyrra og fyrsta í ár.

*FH-liðið hefur unnið alla fjóra leiki sína í Pepsi-deildinni þar sem Bjarni Þór Viðarsson hefur komist á blað.

*Fylkisliðið hefur ekki unnið leik í fyrstu tveimur umferðunum í fimm ár (2011).

*Albert Brynjar Ingason hefur skorað í öllum þremur leikjum Fylkis á móti Breiðabliki síðustu tvö tímabil.

*Damir Muminovic hefur tryggt Blikum þrjú stig í 2 af síðustu 5 leikjum sínum í Pepsi-deildinni.

Þróttarar gerðu betur en gegn FH og náðu í gott stig gegn KR.vísir/vilhelm
Skemmtilegir punktar úr Boltavaktinni:

Tómas Þór Þórðarson á Fjölnisvelli:

„Dómari leiksins er Akureyringurinn Þóroddur Hjaltalín sem ber ekki Jr. lengur fyrir aftan nafnið sitt. Hann er eins og Siggi litli Sörensen í Fóstbræðrum; ekki lítill lengur. Honum til aðstoðar eru Frosti Viðar Gunnarsson og Eðvarð Eðvarðsson. Á skiltinu er verkfræðingurinn Vilhjálmur Alvar Þórarinsson.“

Smári Jökull Jónsson á Þróttaravelli:

„KR-ingar vilja fá víti eftir að Denis fellur í teignum en Guðmundur Ársæll dæmir ekkert. „Why should he dive?“ segir Bjarni Guðjónsson við Gregg Ryder þjálfara Þróttar hér á hliðarlínunni.“

Kristinn Páll Teitsson á Ólafsvíkurvelli:

„Þá tek ég ímyndaðan hatt að ofan fyrir vallarstarfsmönnum Víkings. Völlurinn lítur út fyrir að vera í toppstandi í annarri umferð.“

Hæstu og lægstu einkunnir umferðarinnar:

Hrvoje Tokic, Víking Ó. - 8

Damir Muminovic, Breiðabliki - 8

Arnþór Ari Atlason, Breiðabliki - 8

Martin Lund Pedersen, Fjölni - 8

Andri Fannar Stefánsson, Val - 3

Kristian Larsen, Þrótti - 3

Umræðan á #pepsi365

Mark 2. umferðar Atvik 2. umferðar Markasyrpa 2. umferðar
Pepsi Max-deild karla

Mest lesið


Fleiri fréttir

Sjá meira


×

Mest lesið