Keep Frozen hlaut Einarinn

„Keep Frozen“ eftir Huldu Rós Guðnadóttur og í framleiðslu Helgu Rakelar Rafnsdóttur hlaut Einarinn, áhorfendaverðlaun Skjaldborgarhátíðarinnar. Þetta kemur fram á Klapptré.

Hulda og Helga hafa áður hlotið þessi verðlaun en þær unnu einnig fyrir myndina Kjötborg árið 2008. „Keep frozen“ fjallar um frystitogara.

„Á kaldri vetrarnóttu siglir drekkhlaðinn frystitogari inn í gömlu höfnina í Reykjavík. Í frystilestinni eru 20.000 fiskikassar, hitastigið er -35 C. Hópur manna hefur tvo sólarhringa til að tæma skipið.  Á meðan við fylgjumst með þeim framkvæma hið ómögulega heyrum við sögur af karlmennsku og rómantík, gamni og dauðans alvöru.“ Með þessum hætti er myndinni lýst á vef Kvikmyndamiðstöðvar Íslands. 

Skjaldborg er hátíð íslenskra heimildarmynda og var haldin í tíunda sinn í ár. Hún er haldin á Patreksfirði og fór fram dagana 13. – 16. maí. „Keep Frozen“ verður sýnd í Bíó Paradís frá og með morgundeginum í að minnsta kosti tvær vikur.

„Auk þess að frumsýna nýjar íslenskar heimildamyndir er hátíðinni ætlað að vera tækifæri fyrir kvikmyndagerðarfólk og áhugamenn um heimildamyndir til að koma saman. Í lok hátíðarinnar verður besta heimildamyndin á Skjaldborg 2016 valin af áhorfendum. Skjaldborg sýnir heimildamyndir sem annars kæmu varla fyrir augu almennings og ber jafna virðingu fyrir hinu smáa, stóra, skrýtna og fokdýra. Á dagskrá hátíðarinnar hafa verið bæði örstuttar myndir og í fullri lengd og efnistökin fjölbreytt.“ 

KEEP FROZEN Í Bío Paradís from Hulda Ros Gudnadottir on Vimeo.