Mikilvægi sigurmarks Pálma Rafns á móti FH meira en bara stigin þrjú

FH og KR hafa unnið tíu af síðustu þrettán Íslandsmeistaratitlum í karlafótboltanum og leikir liðanna hafa ráðið miklu um þróun mála það sumarið.

Fylgni úrslita þeirra leikja og árangur liðanna það sumarið er þó við fyrri leikinn en ekki þann síðari. Mark Pálma Rafns Pálmasonar réð úrslitum á KR-vellinum í fyrrakvöld og ef marka má þróun mála frá uppkomu Hafnfirðinga fyrir þrettán árum þá boðar þessi sigur afar gott fyrir KR-liðið.

Á undanförnum þrettán tímabilum hefur sigurvegari fyrri leiks KR og FH endað tólf sinnum ofar í töflunni um haustið og níu sinnum hefur sigurvegari fyrri leiks FH og KR farið alla leið og unnið sjálfan Íslandsmeistaratitilinn nokkrum mánuðum síðar.

Knattspyrnan var oft í aukahlutverki á vetrarlegum fótboltavelli þeirra KR-inga á fimmtudagskvöldið en það mátti vel greina það á baráttunni að mikið var undir í þessum fyrsta risaleik tímabilsins.

Undantekningin frá reglunni er sumarið 2012 þegar KR vann 2-0 sigur í fyrri leik liðanna og reyndar báða innbyrðisleiki liðanna en það voru hins vegar FH-ingar sem fengu fjórtán stigum meira en Vesturbæjarliðið og tryggðu sér titilinn í september.

Það eru enn 19 af 22 umferðum eftir af mótinu og því á vissulega mikið eftir að gerast. KR-ingar stimpluðu sig hins vegar inn í mótið með þessum sigri og þó að sigurinn hafi hjálpað Stjörnumönnum mest eins og staðan er í dag þá segir hefð síðustu ára okkur það að KR-ingar eiga að enda ofar en FH í töflunni.

Hvað boða úrslitin í fyrri leik KR og FH á Íslandsmótinu?

2003     KR vann 2-1     KR Íslandsmeistari    FH 2. sæti

2004     FH vann 1-0     FH Íslandsmeistari    KR 6. sæti

2005     FH vann 1-0     FH Íslandsmeistari     KR 6. sæti

2006     FH vann 3-0     FH Íslandsmeistari     KR 2. sæti

2007     FH vann 2-0     FH 2. sæti     KR 8. sæti    Valur Íslandsmeistari

2008     FH vann 2-0     FH Íslandsmeistari     KR 4. sæti

2009     FH vann 2-1     FH Íslandsmeistari     KR 2. sæti

2010     FH vann 3-2     FH 2. sæti     KR 4. sæti    Breiðablik Íslandsmeistari

2011     KR vann 2-0     KR Íslandsmeistari     FH 2. sæti

2012     KR vann 2-0     FH Íslandsmeistari     KR 2. sæti     Undantekning reglunnar

2013     KR vann 4-2     KR Íslandsmeistari     FH 2. sæti

2014     FH vann 1-0     FH 2. sæti    KR 3. sæti    Stjarnan Íslandsmeistari

2015     FH vann 3-1     FH Íslandsmeistari     KR 4. sæti

2016     KR vann 1-0     ???