Bjarni Guðjóns með betri árangur hjá KR en pabbi sinn

Bjarni Guðjónsson, þjálfari KR, fékk óvænta gagnrýni frá föður sínum Guðjóni Þórðarsyni eftir tap KR-liðsins út í Eyjum í 7. umferð Pepsi-deildarinnar um helgina.

KR-liðið hefur aðeins unnið 2 af 8 leikjum sínum í deild og bikar á tímabilinu, er úr leik í bikarnum og aðeins í 8. sæti í Pepsi-deildinni.

Sjá einnig: Bjarni um gagnrýni föður síns: Get lítið pælt í því sem honum finnst

Guðjón Þórðarson þekkir það að þjálfa KR-liðið en hann gerði það í tvö tímabil á árunum 1994 til 1995. Guðjón náði ekki að gera KR að Íslandsmeisturum en liðið vann bikarinn bæði ár hans með Vesturbæjarliðið.

Bjarni er á sínu öðru tímabili með KR-liðið en vegna þess að það eru spilaðir fleiri leikir nú en fyrir tuttugu árum þá vantar hann aðeins sjö leiki upp á það að vera búinn að stýra KR-liðinu í jafnmörgum deildarleikjum og faðir sinn.

Það er því tilvalið að bera saman árangur þeirra feðga sem þjálfarar KR-liðsins.

Sjá einnig:  Guðjón Þórðarson hjólar í KR: Ekki skrítið að liðið sé í þeirri stöðu sem það er í

KR vann 18 af 36 deildarleikjum, tapaði 10 sinnum undir stjórn Guðjóns Þórðarsonar frá 1994-95 og fékk 62 stig eða 57,4 prósent stiga í boði.

KR hefur unnið 14 af 29 deildarleikjum undir stjórn Bjarna Guðjónssonar, hefur tapað 6 leikjum og er búið ná í 51 stig í þessum leikjum eða 58,6 prósent stiga í boði.  

Bjarni er því enn fyrir ofan föður sinn hvað varðar hlutfallsstig í húsi en hefur þó jafnframt ekki efni á mörgum tapleikjum í viðbót ætli að hann halda sér fyrir ofan Guðjón.

KR-liðið skoraði meira undir stjórn Guðjóns (1,69 mörk í leik) en undir stjórn Bjarna (1,45 mörk í leik) en fékk aftur á móti fleiri mörk á sig í þjálfaratíð Guðjóns (1,17) en í þjálfaratíð Bjarna (0,93).

Það er hægt að sjá umfjöllun strákanna í Pepsi-mörkunum um mál feðganna með því að smella hér en þeir Hjörvar Hafliðason og Arnar Gunnlaugsson voru ekki alveg sáttir með þann gamla.