„Búnir að vera í basli en þetta er vonandi byrjun á betri spila­mennsku“

Valur hafði náð forystunni í fyrri hálfleik með frábæru marki Dags Inga Garðarssonar en Breiðablik náði að jafna leikinn í seinni hálfleik eftir þrumuskot Davíðs Ingvarssonar. 

Blikarnir virtust síðan líklegri til að skora þriðja markið en Valsmenn náðu að snúa leiknum við.

Tryggvi skoraði annað mark Vals á 79. mínútu með skalla sem fór í stöngina og inn eftir frábæra fyrirgjöf á fjærstöngina frá Herði Inga Gunnarssyni. 

Tryggvi lagði síðan upp þriðja mark Vals eftir skyndisókn, fyrir Jónatan Inga Jónsson. 

„Við komum út í seinni og virtumst bara vera að bíða eftir því að fá á okkur mark. Svo gerist það loksins og þá var eins og við værum að bíða eftir því að fá á okkur annað.

En við náðum að þétta raðirnar og hvíla okkur með boltann aðeins. Skoruðum svo gott mark og fáum þá framar. Fáum svo þriðja markið eftir skyndisókn í lokin.

Þetta snerist bara um að halda áfram og reyna. Við vorum kannski hræddir eftir að hafa komist yfir í síðasta leik og tapað því niður undir lokin. Við þurftum allavega að hafa fyrir þessu í dag en ég er virkilega sáttur með sigur,“ sagði Tryggvi í viðtali eftir leik.

Aðeins fjórar umferðir eru eftir af venjulegri deildarkeppni fyrir tvískiptingu. Valsmenn ætla sér að enda í efri hlutanum og Tryggvi segir sigurinn nærandi fyrir framhaldið.

„Að sjálfsögðu. Það er ekki mikið af leikjum eftir. Við ætlum að vera í efri hlutanum. Erum búnir að vera í basli en þetta er vonandi byrjun á betri spilamennsku og úrslitum sömuleiðis.“

Stóra spurningin er þá hvort Tryggvi muni klára tímabilið í Valstreyjunni. Hann er á leiðinni aftur heim til ÍA en það liggur ekki fyrir hvort félagaskiptin verði frágengin á næstu dögum eða eftir tímabilið.

„Ég veit ekki betur [en að ég klári tímabilið í Valstreyjunni]. Ég hef, í fullri hreinskilni, hvorki talað við Val eða ÍA undanfarið. Ég held að það sé alveg klárt að ég klári tímabilið hér.“