Þriðji sigur Þórs í röð

Þór vann sinn þriðja leik í röð í Inkasso-deildinni þegar liðið bar sigurorð af Selfossi með einu marki gegn engu á útivelli í dag.

Kristinn Þór Björnsson skoraði eina mark leiksins á 40. mínútu með skoti eftir óbeina aukaspyrnu inni í vítateig Selfyssinga.

Þórsarar fengu aðeins eitt stig úr fyrstu tveimur leikjum sínum í Inkasso-deildinni en hafa nú unnið þrjá leiki í röð, gegn HK, Haukum og Selfossi.

Þór er í 4. sæti deildarinnar með 10 stig, jafnmörg og KA og Leiknir R. sem eru í næstu sætum fyrir ofan. Grindavík er svo á toppnum með 12 stig.

Selfyssingar eru í 9. sæti með sex stig, eftir tvo sigra og þrjú töp.

Upplýsingar um úrslit og markaskorara eru fengnar af úrslit.net.