19 laxar á land fyrsta daginn í Laxá í Kjós

Laxá í Kjós opnaði í morgun og það verður ekki annað sagt en að hér sé enn ein frábær opnun á ferðinni.

"Þegar dagurinn var gerður upp var 19 löxum landað og líklega slapp annað eins" sagði Haraldur Eiríksson í samtali við Veiðivísi í morgun.  "Við erum mjög ánægðir með þessa opnun því þetta er líklega besta opnun í ánni síðan hún varð fly-only.  Það er fiskur upp um alla á og sem dæmi þá gáfu veiðistaðir eins og Skuggi og Stekkjarfljót laxa í gær."  Af þessum 19 löxum voru þrír eins árs laxar en allir hinir mjög vænir tveggja ára laxar sem margir veiðimennirnir höfðu mikið fyrir að ná en á neðstu svæðunum voru laxarnir að stinga sér milli veiðistaða svo það voru oft mikil hlaup á eftir löxum í gær.

"Það hafa legið laxar í Brúarhylnum í nokkra daga og það er líklega klárt mál að það er kominn lax til að mynda upp í Meðalfellsvatn.  En eitt af því sem er mjög athyglisvert við þessa opnun er að sjá sjóbirtinga í aflanum en hann á yfirleitt ekki að sjást fyrr en eftir tvær til þrjár vikur." sagði Haraldur og var að vonum ánægður með gang mála í Kjósinni í gær.  Hópurinn sem er að veiða er mjög afslappaður og fór til að mynda ekki út á seinni vatktinni nema í 2-3 tíma.