Ágæt opnun í Veiðivötnum þrátt fyrir rok

Veiði hófst í Veiðivötnum á laugardaginn og þrátt fyrir leiðindaveður voru nokkrir veiðimenn með fína veiði.

Veiðin í fyrra fór seint af stað vegna aðstæðna en vorið var afar kalt og ennþá ís á sumum vötnum.  Það er allt annað að sjá aðstæður núna þegar fyrstu veiðimenn voru komnir á bakkann en allur ís er löngu farinn og ástand vatnana eins og best verður á kosið.  Veiðin var með ágætum í Fossvötnum, Skálavötnum, Ónýtavatni, Litlasjó og í Hraunvötnum en þar veiddust allt að 6 punda fiskar.  Í Hraunvötnum veiddust nokkrir stórir líka þar á meðal einn 8 punda og nokkrir rétt undir því.  Vænir fiskar veiddust líka í Skálavötnum.

Hlutfall flugu veiddra fiska eykst á hverju ári og alltaf eru veiðimenn að prófa sig áfram með nýjar flugur.  Þær sem hafa verið vinsælar eru t.d. Grænn Nobbler, Gylltur Nobbler, Black Ghost og fleiri.  Í vor komu fram nokkrar feykilega sterkar flugur í urriðann á Þingvöllum og Veiðivísir mælir klárlega með því að þær verði prófaðar því þær virðast vera afskaplega veiðnar. Flestar leiðir um vatnasvæðið eru greiðfærar, þó ennþá skaflar við Eyvík í Litlasjó og við Eskivatnsvað. Vöðin á ánum eru eins og best verður á kosið.