Umfjöllun, einkunnir og viðtöl: Þróttur 1 - Stjarnan 1 | Stjarnan missti af tækifærinu til að komast á toppinn

Stjarnan og Þróttur gerðu 1-1 jafntefli í Laugardalnum í kvöld. Stjörnumenn lágu á Þrótti mest allan leikinn. Þróttarar sköpðu þó oft hættu með flottum skyndisóknum.

Sörensen kom Þrótti yfir eftir flottan sprett Acoff upp kantinn á 18. mínútu. Hilmar Árni jafnaði metin úr vítaspyrnu á 33. mínútu og þar við sat.

Stjarnan hefði komist á toppinn með sigri FH í kvöld.

Stjarnan tekur á móti KR á Samsung vellinum á mánudaginn en Þróttur fer á Kópavogsvöll þar sem Breiðablik verður andstæðingurinn.

Af hverju endaði leikurinn með jafntefli?

Stjörnumenn lágu á Þrótti mest allan leikinn en tókst ekki að nýta sér góðar stöður sem liðið komst í oft á tíðum. Fjöldi hornspyrna og aukaspyrna Hilmars Árna endaði annað hvort í fanginu á Arnari Darra eða var skallaður í burtu. Þá fengu Stjörnumenn nokkur stórhættuleg færi sem ekki tókst að nýta.

Þróttarar áttu fjölda hættulegra skyndisóknar og hin líflegi Acoff olli miklum usla í vörn Stjörnunnar, og lagði upp mark sinna manna. Fótbolti er yfirleitt sanngjörn íþrótt og Stjörnumenn geta ekki kvartað á meðan þeir skora ekki úr þeim færum sem þeir fá.

Hvað gekk vel? 

Arnar Darri var frábær í markinu og greip hverja fyrirgjöfina og hvert skotið á fætur öðru í leiknum. Varnarleikur Þróttar gekk á heildina litið ágætlega þó Stjörnumenn hafi oft komist í ágætis stöður á vellinum. Acoff og Sörensen voru hættulegri þegar Þrótti tókst að sækja hratt, þegar lið Stjörnunnar var mest allt komið fram völlinn.

Hjá Stjörnunni spilaði Heiðar Ægisson einna best djúpur á miðjunni enda gáfu Þróttarar honum mikið pláss til að athafna sig í. Honum tókst að dreifa boltanum ágætlega milli kanta. Liði Stjörnunnar tókst oft á tíðum að láta boltann ganga vel en mistókst að gera sér mat úr fínum færum.

Hvað gekk illa?

Stjörnunni tókst ekki að nýta sín færi í kvöld, Guðjón Baldvinsson fékk nokkur og Hólmbert Aron að minnsta kosti eitt dauðafæri eftir að hann kom inn á.

Þá fór Dion Acoff oft illa með Hörð Árnason á kantinum. Kollegi Harðar í bakverði Þróttar Baldvin Sturluson missti boltann líka oft klaufalega í vörninni.

Hins vegar voru aukaspyrnur og hornspyrnur Hilmars Árna vonbrigði kvöldsins, enda varð sjaldan eitthvað úr þeim.

Hvað gerist næst?

Stjarnan heldur áfram í toppbaráttunni. Liðið er stigi á eftir FH og tekur á móti KR á Samsung vellinum á mánudaginn.

Þróttur er hins vegar enn límt við botninn, 9 stigum frá öruggu sæti. Þróttarar fara á Kópavogsvöll þar sem Breiðablik verður andstæðingurinn.

Greg Ryder: Dómarnir hljóta að fara að falla með okkur

„Við spiluðum vel, líkt og gegn KR og Víkingi. Í þeim leikjum náðum við ekki úrslitum en í kvöld náðum við þeim úrslitum sem við áttum skilið,” segir Greg Ryder þjálfari Þróttar, sem enn er fullviss um að liðinu takist að halda sér uppi.

Björgvin Stefánsson framherji Þróttar skoraði mark sem dæmt var af vegna rangstöðu við mikil mótmæli leikmanna Þróttar.

Ryder segist ekki hafa séð atvikið nógu vel. Hann segir að honum hafi í síðust leikjum fundið dómara á köflum hafa farið illa með sína menn, dómararnir hljóti að fara að falla með hans mönnum.



Rúnar Páll: Ekki nógu góðir fyrir framan markið

Rúnar Páll Sigmundsson, þjálfari Stjörnunnar, segir frammistaða liðsins hafi verið ágæt út á velli en ekki nógu góð fyrir framan markið. Þá hafi liðið ekki nýtt nógu vel aukaspyrnur, hornspyrnur og fyrirgjafir í leiknum.

Rúnar Páll segir það hafa verið viss vonbrigði að hafa ekki unnið leikinni. „Það eru alltaf vonbrigði að vinna ekki leiki.“

En liðið hafi fengið fjölda tækifæra til að skora. „En því miður gekk það ekki í dag“

Jóhann Laxdal: Þarf bara að vera á réttum tíma á toppnum

Jóhann Laxdal, varnarjaxl Stjörnunnar, segir að lið hans hafi verið ágætt á köflum í kvöld en smá ákefð hefði vantað inn í teignum eftir 1-1 jafntefli við Þrótt í kvöld.

Liðið hafi hins vegar misst dampinn í seinni hálfleik eftir að hafa látið hann ganga vel framan af leik. Ekki hafi gengið nógu vel að opna vörn Þróttar til að fá afgerandi færi.

Jóhann segir það viss vonbrigði að hafa ekki náð toppsætinu eftir tap FH í kvöld en sigur hefði fleytt Stjörnunni í efsta sæti deildarinnar. „Það eru alltaf vonbrigði að komast ekki á toppi þegar tækifæri er til en það þarf bara að vera á réttum tíma á toppnum og það er það sem við ætlum okkur að gera.“