Gott skot í Tungufljóti í Biskupstungum

Tungufljót í Biskupstungum er áhugavert svæði að veiða en hefur ekki verið mikið stundað í sumar.

Það hefur ekki verið mikil veiði í Tungufljóti í sumar, í það minnsta ekki sem veið höfum haft fregnir af, en laxinn virðist koma heldur seinna í ánna en venjulega.  Ánni er haldið uppi með seiðasleppingum og það hefur verið misjafnt á milli ára hvenær mestu göngurnar eru að skila sér inn.  Það hefur að öllu jöfnu verið um og eftir miðjan júlí en í ár virðist þetta seinna á ferðinni.  Það eru þó góðar fréttir fyrir þá veiðimenn sem eiga eftir að fara í ánna því það virðist töluvert af laxi hafa gengið í hana síðustu daga.

Gott dæmi um það er holl sem var við veiðar í gær sem landaði 21 laxa á einni morgunvakt.  Það veiðist oftar en ekki mest í veiðistaðnum Faxa sem er einn af fallegri veiðistöðum landsins enda er alveg magnað að standa við úðann af fossinum og kasta flugu á breiðuna þar fyrir neðan.  Laxinn safnast upp á þessari breiðu áður en hann heldur áfram upp laxastigann.  Það verður fróðlegt að heyra meira af veiðimönnum í Tungufljóti því haustveiðin þar getur oft verið mjög drjúg.