Fjöldamorð Íslendinga

Gunnþóra Gunnarsdóttir skrifar 21. september 2016 11:15

Baskarnir misstu skipin í ís á sínum tíma, því voru teknar upp senur við ósa Jökulsár á Breiðamerkursandi. Mynd/www.seylan.is

Mörg sviðssett atriði voru tekin hér á landi fyrir heimildarmyndina Baskavígin sem frumsýnd er í dag á kvikmyndahátíðinni í Bilbaó á Spáni. Enda gerðust þeir atburðir hér sem myndin fjallar um, það er að segja víg baskneskra skipbrotsmanna á Vestfjörðum haustið 1615.

Hjálmtýr Heiðdal verður viðstaddur frumsýninguna í Bilbaó, þar sem myndin keppir til verðlauna.

„Það var filmað á ellefu stöðum og verkefnið tókst mjög vel,“ segir Hjálmtýr Heiðdal í kvikmyndagerðinni Seylu sem er meðframleiðandi myndarinnar með Old Port Films í Bilbaó.

Hann segir fimm íslenska áhugaleikara í veigamiklum hlutverkum Jóns lærða, Sigríðar konu hans, Ara í Ögri, séra Jóns Grímssonar í Árnesi og Gunnsteins Grímssonar í Dynjanda. Auk þess bregði 120 íslenskum aukaleikurum fyrir.

„Við þurftum 40 manns við Jökulsárlón og annan eins hóp norður í Bjarnarfirði. Svo vantaði statista til að leika Baska og við vorum með góðan hóp af Spánverjum sem eru búsettir hér,“ lýsir hann.

Hilmar Örn Hilmarsson samdi tónlistina í myndinni sem er á fjórum tungumálum, á baskamálinu euskeru, ensku, spænsku og íslensku.

Enska útgáfan verður sýnd á Riff og íslenska útgáfan frumsýnd í nóvember í Bíói Paradís. –

Greinin birtist fyrst í Fréttablaðinu 21. september 2016.

Bíó og sjónvarp Menning RIFF