BL með meira en fjórðungs markaðshlutdeild

Ríflega fjórði hver nýr bíll sem keyptur hefur verið hér á landi í ár er frá Bílaumboðinu BL, en BL er með 26% markaðshlutdeild það sem af er árinu. Næst þar á eftir kemur Hekla með 18% hlutdeild, þá Toyota með 17,2% og Brimborg með 12,4%. Alls eru því þessi fjögur stærstu umboð með 73,6% markaðarins.

Nær víst er að BL muni fara yfir 5.000 bíla sölu í ár, en til enda október hefur umboðið selt 4.750 bíla og seldi 248 í síðasta mánuði. Ef það sama verður uppá teningnum á þeim tveimur mánuðum sem eftir eru af árinu verður salan því um 5.250 bílar.

Með sömu reikningsaðferð mun Hekla selja um 3.670 bíla ár, Toyota 3.440 og Brimborg 2.550 bíla. Heildarsala nýrra bíla árinu stefnir því, með sömu reiknisaðferðum, í 20.070 bíla og mjög gott söluár. Með þeim fjölda mun meðalaldur bíla á landinu lækka og hefur slíkt ekki gerst frá hruni.

Hafa verður þó í huga að af þeim 18.283 bílum sem selst hafa á árinu til loka október eru 8.345 til bílaleiga, en þeir enda engu að síður flestir í eigu almennings og fyrirtækja.