Fjölnir framlengir við sína efnilegustu leikmenn

Fjölnir hefur framlengt samninga tveggja af efnilegustu leikmönnum liðsins, Birnis Snæs Ingasonar og Hans Viktors Guðmundssonar.

Birnir Snær og Hans Viktor, sem eru tvítugir, voru báðir fastamenn í liði Fjölnis sem náði besta árangri í sögu félagsins í sumar. Grafarvogsliðið endaði í 4. sæti Pepsi-deildarinnar og missti naumlega af Evrópusæti.

Birnir Snær lék 15 deildarleiki með Fjölni á síðasta tímabili og skoraði þrjú mörk. Hann hefur alls leikið 20 leiki í efstu deild og skorað þrjú mörk.

Hans Viktor lék 19 af 22 leikjum Fjölnis í Pepsi-deildinni á síðasta tímabili og skoraði tvö mörk. Hann var valinn í U-21 árs landsliðið í sumar en á enn eftir að spila sinn fyrsta leik fyrir liðið.