Viðskipti innlent

Vilja einbeita sér að fjórfalt stærri olíulind en fundist hafi við Noreg

Kristján Már Unnarsson skrifar

Kanadíska olíufélagið Ithaca hefur skilað inn sérleyfi sínu á Drekasvæðinu. Stjórnarformaður Eykons segir menn vilja einbeita sér að sérleyfi kínverska félagsins CNOOC, sem gefi fyrirheit um fjórfalt stærri olíulind en fundist hafi við Noreg og Bretland. Þetta kom fram í fréttum Stöðvar 2. 



Svo vill til að það eru nákvæmlega fjögur ár í dag frá því olíuleitin hófst formlega þegar fyrstu sérleyfunum var úthlutað í Ráðherrabústaðnum. Það var í tíð ríkisstjórnar Samfylkingarinnar og Vinstri grænna sem fyrstu tvö leyfin voru afhent en ríkisstjórn Sjálfstæðisflokks og Framsóknarflokks var tekin við þegar þriðja sérleyfinu var úthlutað.

Guðni A. Jóhannesson orkumálastjóri, í miðið, afhenti fyrstu leyfin þann 4. janúar 2013 að viðstöddum Steingrími J. Sigfússyni atvinnuvegaráðherra og Ola Borten Moe olíumálaráðherra Noregs.Vísir/Stefán.

En síðan hefur saxast á hóp sérleyfishafanna. Hópur undir forystu Faroe Petroleum skilaði inn sínu leyfi fyrir tveimur árum og í dag tilkynnti Orkustofnun að Ithaca-hópurinn hefði einnig lagt inn sitt leyfi. Þar með stendur hópur undir forystu kínverska félagsins CNOOC einn eftir. 



Í tilkynningu Orkustofnunar kemur fram að túlkun gagna, sem rannsóknarskipið Harrier Explorer aflaði fyrir Ithaca á Drekasvæðinu síðastliðið sumar, hafi leitt til þeirrar ályktunar að ekki væri ástæða til að halda áfram olíuleitinni.

Rannsóknaskipið Harrier Explorer á ytri höfninni í Reykjavík síðastliðið sumar áður en það hélt á Drekasvæðið á vegum Ithaca-hópsins.Stöð 2/Arnar Halldórsson.

Íslenska félagið Eykon er aðili að leyfinu sem skilað var í dag en einnig að eina leyfinu sem nú er eftir, og ráðamenn þessu eru ekki á því að þetta boði einhver endalok. Stjórnarformaður Eykons, Heiðar Guðjónsson, segir félagið hafa stutt það að Ithaca-leyfinu yrði skilað inn enda sé CNOOC-leyfið mun vænlegra.

Ithaca-leyfið, sem skilað var í dag, er nyrst á Drekasvæðinu. CNOOC-leyfið er nær Íslandi og mun stærra.Grafík/Tótla I. Sæmundsdóttir.

„Við erum í raun og veru að viðurkenna það að við erum ekki að fara að bora á báðum stöðunum. Við ætlum að bora á öðrum staðnum og þá veljum við þann stað sem er meira lofandi og það er CNOOC-leyfið,“ segir Heiðar. 



„Þar erum við með gríðarstóra olíugildru sem er áttahundruð ferkílómetrar, - í raun og veru fjórum sinnum stærri heldur en nokkur olíulind eða gaslind sem hefur fundist í kringum Noreg eða Bretland. Það er auðvitað svæði sem við viljum einbeita okkur að.“ 



Skip á vegum CNOOC-hópsins, Oceanic Challenger, rannsakaði Drekasvæðið haustið 2015. Heiðar segir að frekari mælingar á svæðinu verði boðnar út fyrir lok þessa árs.

Rannsóknarskipið sem fór á Drekasvæðið haustið 2015 á vegum CNOOC-hópsins.Stöð 2/Egill Aðalsteinsson.

„Svo verða mjög umfangsmiklar mælingar í gangi 2018 og við stefnum ótrauðir á að bora þar 2020,“ segir stjórnarformaður Eykons.

Olíuleit á Drekasvæði

Tengdar fréttir

Reyðarfjörður valinn sem olíubær Íslands

Eykon Energy hefur valið Reyðarfjörð sem þjónustumiðstöð fyrir bæði olíuleit og olíuvinnslu á Drekasvæðinu. Formaður bæjarráðs Fjarðabyggðar segir þetta skapa gríðarleg tækifæri.

Kanadískt félag yfirtekur sérleyfi á Drekasvæðinu

Kanadískt olíufélag, Íþaka, er orðinn rétthafi og rekstraraðili annars af tveimur olíuleitarleyfunum á íslenska Drekasvæðinu eftir að það yfirtók breska olíufélagið Valiant. Ekki eru nema fjórir mánuðir liðnir frá því að íslensk stjórnvöld úthlutuðu fyrstu tveimur sérleyfunum til rannsókna og vinnslu olíu á Drekasvæðinu. Fulltrúi breska félagsins Valiant tók við öðru leyfinu sem rekstraraðili með 56,25% prósenta hlut en íslenska félagið Kolvetni, með 18,75%, og norska ríkisolíufélagið Petoro, með 25%, eru einnig aðilar að leyfinu. Nú hefur Ithaca Energy tekið yfir hlutverk Valiant sem rekstraraðili leyfisins en til þess þurfti samþykki Orkustofnunar. Kanadíska félagið gerði eigendum Valiant 36 milljarða króna yfirtökutilboð sem fallist var á og var endanlega gengið frá yfirtöku Íþöku á Valiant fyrir um tveimur vikum. Íþaka var stofnað í Alberta í Kanada árið 2004 og er skráð í kauphöllunum í Toronto og London. Meginstarfsemi félagsins felst í olíu- og gasvinnslu í Norðursjó þar sem félagið kemur að rekstri nokkurra svæða. Það stundar einnig olíuleit og olíuboranir. Það telst ekki stórt í olíuheiminum en velta þess á síðasta ári nam um 20 milljörðum króna.

Er það von um "elefant" sem lokkar á Drekann?

Olíumálaráðherra Noregs, Ola Borten Moe, er í viðtali við Aftenbladet í Stavanger spurður um hvort hann telji að "elefant“ sé á Drekasvæðinu. Hugtakið "elefant“, eða fíll, er það sem norski olíugeirinn notar um risalindir, eftir stærsta landdýri jarðar, en það eru olíusvæði eins og Ekofisk, Statfjord, Troll, Gullfaks og Mjallhvít. Hugtakið "flóðhestur“ er svo notað um lindir af næstu stærð þar fyrir neðan.

Milljarðar í olíuleit á Drekanum

Fyrirtækin sem hafa leyfi til olíuleitar á Drekasvæðinu hafa þegar varið um þremur milljörðum króna til rannsókna. Í desember liggja fyrir niðurstöður mælinga beggja leyfishafa og framhald rannsókna skýrist.



Mest lesið


Fleiri fréttir

Sjá meira


×

Mest lesið