Jack Nicholson mun leika í endurgerð á Toni Erdmann

Aðdáendur Jack Nicholson geta tekið gleði sína á ný því hann hefur tekið að sé hlutverk í nýrri kvikmynd. Um er að ræða endurgerð á þýsku myndinni Toni Erdmann sem tilnefnd er til Óskarsverðlauna í ár sem besta erlenda kvikmyndin.

Nicholson, sem hefur unnið til þrennra Óskarsverðlauna á ferlinum, mun leika á móti Kristen Wiig  en þetta verður fyrsta hlutverk hans í kvikmynd frá árinu 2010, rómantísku gamanmyndinni How Do You Know.

Nicholson, sem verður áttatíu ára á árinu, er sagður mikill aðdáandi upprunalegu myndarinnar frá Þýskalandi og hafði samband við forsvarsmenn kvikmyndaversins Paramount með það í huga að endurgera myndina.

Þess má geta að Toni Erdmann verður frumsýnd á þýskum bíódögum í Bíó Pardís á föstudag og fer svo í almennar sýningar eftir það.