Valur fer vel af stað í A-deild Lengjubikars kvenna.
Valskonur gerðu góða ferð á Akureyri og unnu 0-3 sigur á Þór/KA í Boganum í kvöld.
Mörkin þrjú komu öll á fimm mínútna kafla seint í fyrri hálfleik. Elín Metta Jensen kom Val yfir á 32. mínútu og tveimur mínútum síðar bætti Vesna Elísa Smiljkovic öðru marki við. Á 37. mínútu var röðin svo komin að landsliðsfyrirliðanum Margréti Láru Viðarsdóttur.
Fleiri urðu mörkin ekki og Valur fagnaði öruggum 0-3 sigri.
Breiðablik vann ÍBV með sömu markatölu í Fífunni.
Hildur Antonsdóttir kom Blikum yfir á 29. mínútu og Fanndís Friðriksdóttir og Rakel Hönnudóttir bættu svo tveimur mörkum við á síðustu sex mínútum leiksins.
Á lokamínútunni fékk Eyjakonan Linda Björk Brynjarsdóttir að líta sitt annað gula spjald og þar með rautt.
Valur er á toppi riðilsins með sex stig og markatöluna 9-3. Breiðablik er í 2. sæti með fjögur stig.
Valur kláraði Þór/KA á fimm mínútum
