Blikar búnir að selja 25 leikmenn frá árinu 2005

Rúmlega 1500 æfa fótbolta undir merkjum Breiðabliks í Kópavogi.  Frá 2005 hefur félagið selt 25 leikmenn til erlendra liða.

Hinn 16 ára Arnór Borg Guðjohnsen var í gær seldur til velska úrvalsdeildarliðsins Swansea og fetar sömu braut og faðir hans Arnór og bróðir hans Eiður Smári.   

Arnar Björnsson hitti Eystein Pétur Lárusson, framkvæmdastjóra knattspyrnudeildar Breiðabliks og forvitnaðist um hvað sé í gangi hjá Blikum.

„Við erum búnir að selja fjóra leikmenn frá áramótum. Ég get ekki neitað því að félagið er að fá pening fyrir leikmennina en við erum líka að leyfa þessum ungu krökkum að láta drauma sína rætast og reynum því alltaf að ná samkomulagi. Þetta eru einhverjar upphæðir og þær nýtast vel í starfið,“ sagði Eysteinn Pétur Lárusson í viðtalinu við Arnar.

Rúmlega 1500 æfa fótbolta hjá félaginu.Verður það framtíðin að Breiðablik selji leikmenn á hverju einasta ári?

„Ef við tökum tölfræðina frá 2005 þá hafa um 25 leikmenn farið frá þeim tíma. Það er horft til Íslands eftir árangur landsliðsins í Evrópukeppninni í fyrra. Þjálfun yngri flokka á Íslandi hefur tekið miklum breytingum undanfarin ár og er alltaf að verða betri og betri. Aðstaðan er líka að verða betri og við erum svo heppnin hér í Kópavogi að vera með Fífuna“ sagði Eysteinn Pétur.

Svo gæti farið að félagið selji fleiri leikmenn á næstunni.

„Við erum einn okkar besta leikmann, Oliver Sigurjónsson, og það er mikið horft til hans. Við höfum metið það í sameiningu að það sé betra fyrir hann að byrja tímabilið hér og brillera með okkur í sumar. Það er alltaf eitthvað,“ sagði Eysteinn Pétur.

„Ég er líka með tvær stelpur sem hafa verið til skoðunar og þetta er nánast eitthvað að koma upp á hverjum degi hérna hjá Blikum,“ sagði Eysteinn Pétur en hann er þar að tala um þær Fanndísi Friðriksdóttur og Svövu Rós Guðmundsdóttir.

Það má sjá alla frétt Arnars Björnssonar í spilaranum hér fyrir ofan.