Ólafía Þórunn fékk sér að sjálfsögðu Hawaii pizzu á Hawaii

Íslenski atvinnukylfingurinn Ólafía Þórunn Kristinsdóttir er komin til Hawaiieyja þar sem hún mun í páskavikunni taka þátt í Lotte Championship mótinu á bandarísku mótaröðinni í golfi.

Mótið fer fram hjá Ko Olina golfklúbbnum á Oahu-eyju en golfvöllurinn er norðvestur af höfuðborginni Honolulu.

Þetta er fimmta LPGA-mótið hjá Ólafíu Þórunni sem er fyrsti íslenski kylfingurinn sem fær keppnisrétt á þessari sterkustu mótaröð heims hjá konunum.

Ólafía Þórunn komst í gegnum niðurskurðinn á fyrstu tveimur mótunum en hefur nú tvisvar í röð dottið út eftir niðurskurðinn. Það voru vissulega vonbrigði fyrir okkar konu sem ætlar ekkert að gefast upp.  

Hún setti inn „Ég kem aftur“ áTwitter-síðu sína og það verður fróðlegt að sjá hvernig henni gengur á þessu móti.

Ólafía Þórunn er þekkt fyrir að bregða á leik á samfélagsmiðlum. Hún hélt upp á komuna til Hawaiieyja með því að panta sér girnilega Hawaii pizzu eins og sjá má hér fyrir neðan.

Ólafía Þórunn er í ráshóp með þeim Annie Park frá Bandaríkjunum og Hye Jin Choi frá Suður-Kóreu og hefja þær leik klukkan 13.45 á staðartíma á Skírdag eða klukkan 23.45 að íslenskum tíma.

Hawaii

A post shared by Ólafía Kristinsdóttir (@olafiakri) on Apr 7, 2017 at 5:15pm PDT