Logi í viðræðum við Víkinga

Logi Ólafsson er maðurinn sem Víkingar í Reykjavík vilja að taki við þjálfarastarfinu hjá liðinu eftir að Milos Milojevic sagði upp störfum og gekk í raðir Breiðabliks.

Víkingar eru í viðræðum við Loga samkvæmt heimildum fótbolti.net en hann stýrði liðinu til Íslandsmeistaratitils árið 1991.

Logi þjálfaði síðast Stjörnuna árið 2013 en hann hefur á löngum ferli þjálfað meðal annars ÍA, KR, FH, Selfoss og bæði karla- og kvennalandsliðið.

Logi hefur undanfarin tvö tímabil verið sérfræðingur í Pepsi-mörkunum auk þess sem hann hefur verð sérfræðingur í beinum útsendingum Stöð 2 Sport í Pepsi-deildinni og Borgunarbikarnum um árabil.

Víkingar eiga næst leik á móti KA fyrir norðan á laugardaginn.