Stjarnan aldrei tapað leik í fyrstu fjórum umferðunum með Rúnar í brúnni

Stjarnan varð í gærkvöldi fyrsta liðið til að vinna sjóðheita nýliða KA en Garðbæingar höfðu betur, 2-1, í stórleik gærkvöldsins með sigurmarki í uppbótartíma.

Guðjón Baldvinsson kom Stjörnunni yfir á 22. mínútu áður en Ásgeir Sigurgeirsson jafnaði metin á 42. mínútu. Það var svo Eyjólfur Héðinsson sem tryggði Garðbæingum sigurinn með marki á sjöttu mínútu í uppbótartíma.

Stjarnan er ósigruð með tíu stig á toppnum í Pepsi-deildinni eftir fjórar umferðir og verður þar þegar umferðinni er lokið nema að Valur vinni fimma marka sigur á KR í stórleik umferðarinnar sem fram fer í kvöld.

Það ætti kannski að koma neinum á óvart að Stjarnan sé taplaus á þessum tímapunkti því frá því að Rúnar Páll Sigmundsson var ráðinn þjálfari liðsins fyrir tímabilið 2014 hefur liðið aldrei tapað leik í fyrstu fjórum umferðunum.

Íslandsmeistaraárið 2014 vann Stjarnan þrjá leiki og gerði eitt jafntefli í fyrstu fjórum og það sama gerðist 2016 og aftur í ár. Sumarið 2015 vann Stjarnan tvo leiki og gerði tvö jafntefli í fyrstu fjórum.

Frá því Rúnar Páll tók við liðinu hefur Stjarnan unnið ellefu af sextán leikjum sínum í fyrstu fjórum umferðum Pepsi-deildarinnar, gert fimm jafntefli og ekki tapað einum leik. Liðið er búið að safna 38 stigum af 48 mögulegum í þessum leikjum eða 79 prósent.

Stjarnan í fyrstu fjórum umferðunum undanfarin fjögur ár:

2014

3 sigrar, 1 jafntefli

2015

2 sigrar, 2 jafntefli

2016

3 sigrar, 1 jafntefli

2017

3 sigrar, 1 jafntefli

Samanlagt 2014-2017

11 sigrar, 5 jafntefli

38 stig í húsi af 48 mögulegum (79%)