3532 fiskar komnir á land úr Veiðivötnum

Vikutölur úr Veiðvötnum voru birtar á heimasíðu vatnanna í fyrradag og það kemur svolítið á óvart að sjá þessar tölur.

Snjóölduvatn er að stinga af í aflatölum með 1814 fiska á land og þar af 1730 bleikjur en 84 urriða.  Litli Sjór er með 441 og Hraunvötn 215.  Önnur vötn eru með minna.  Heildarveiðin skiptist þannig að 1083 urriðar hafa veiðst og 2449 bleikjur. Stærsti fiskurinn ennþá er 11.5 pund úr Grænavatni sem kemur lílega ekki á óvart og meðalþyngdin í Veiðivötnum er en sem komið er 1,26 pund og það sem togar þessa tölu niður er bleikjan sem er mest eins punda í Snjóölduvatni en auðvitað veiðast þær margar stærri.  Heildarveiðin er sú næst mesta á sama tímabili frá 2011.

Það hefur verið ansi mikið í Litla Sjó og ófært á svæðinu við Hermannsvík upp í Hraunvötn.  Það slær út nokkrum vinsælum veiðistöðum en það kemur varla að sök því nóg er plássið á þessu fallega vatnasvæði.  Veiðin er síðan auðvitað þannig að ekki eru allir jafn fengsælir og þeir sem þekkja vötnin vel veiða vel.  Dæmi eru um vana veiðimenn með 15-20 fiska á dag en sumar daga taka þessir veiðimenn jafnvel meira en það.  Eitthvað er af lausum leyfum í vötnin svo það er ekki of seint að skella sér í hálendisveiði og umhverfið skemmir ekkert fyrir.  Heildarlistinn yfir veiðina í vötnunum má finna á www.veidivotn.is