104 sm stórlax á land í Stóru Laxá

Stóra Laxá í Hreppum átti glæsilega opnun eins og við höfum greint frá en að því viðbættu var stærsti laxinn semn hefur veiðst í sumar vieddur í henni í fyrradag.

Arnar Tómas var við veiðar í Stóru Laxá en hann er í forsvari fyrir veiðiþjónustuna Tomas Flytours, og það er víst engu logið um það þegar því er kastað fram að svona fiska verður erfitt að toppa.   "Fiskurinn tók í öðru kasti með sunray shaddow orginal útgáfunni í Neðri Nálarhyl, ég þverkastaði yfir að bakkanum hinum meginn og strippaði ákaft inn.  Fyrir miðri á í djúpu rennunni kemur þessi svaka bolti hálfur uppúr og neglir fluguna. Ég sa strax að hann væri i stærri kantinum ég ákvað þar sem ég var aleinn að taka varlega en ákaft á honum" sagði Arnar Tómas í samtali við Veiðivísi.

"Til að gera langa sögu stutta þá dró hann mig upp í Efri Nálarhyl og þaðan i einni bunu niður í Efri Heimahyl með mig tipplandi á stórgrýti a eftir honum.  Ég náði að koma honum inn á mill tveggja grjóta þar sem ég sporðtók flykkið og vá! Eftir rúmar 50 minútur í baráttu lá fyrir framan mig ekta Stóru Laxár lax.  Vígalegur hængur, eftir snögga myndatöku og sexfalda mælingu til að vera alveg viss reyndist hann vera 104cm og svo var honum sleppt aftur út í á. Gjörsamlega frábær minning sem heldur manni heitum i gegnum næsta vetur.  Ég vill taka fram að Lax-á á stórt lof fyrir að taka ánna undir hendurnar og vernda þessa perlu" bætir hann við sannarlega sæll með fenginn.

Við óskum Arnari Tómas til lukku með þennan glæsilega lax.