Ekki svigrúm til þess að lækka þjónustugjöld til almennings

Íslandsbanki hagnaðist um rúma tíu milljarða fyrstu níu mánuði þessa árs, samkvæmt uppgjöri sem var birt í dag. Aukning hefur verið á lánum vegna húsnæðis- og bílakaupa á síðustu misserum. Bankastjóri Íslandsbanka segir þó ekki mikið svigrúm til þess að lækka þjónustugjöld til almennings.

Íslandsbanki birti í dag uppgjör fyrir fyrstu níu mánuði þessa árs, hagnaður eftir skatta nam 10,1 milljarði borið saman við rúma 15 milljarða í fyrra, en þá hagnaðist bankinn á sölu Borgunnar á hlutum í Visa Europe. Útlán hafa aukist um 54 milljarða á þessu ári, þá einkum til fyrirtækja. Arðsemi eigin fjár var 7,7% á tímabilinu samanborið við 10,3% á fyrstu níu mánuðum síðasta árs. Í tilkynningu frá Íslandsbanka í dag kom fram að þessi hagnaður væri í samræmi við markmið bankans.

„Við sáum mjög góðan vöxt á fyrri hluta árs, núna fyrstu níu mánuðina í útlánum hjá bankanum. Þetta er að koma samt alls staðar að. Þetta eru bæði húsnæðislán, bílalán og fyrirtækjalán. Auðvitað hefur verið fjárfestingarþörf í ákveðnum geirum eins og til dæmis í ferðaþjónustunni, og við höfum verið að taka þátt í því en auðvitað sjáum við að eftirspurn er aðeins að minnka varðandi fjárfestingar þar,“ segir Birna Einarsdóttir bankastjóri Íslandsbanka.

Íslandsbanki hefur lokað 12 útibúum á síðustu sex árum og eru þau nú 14 talsins. Birna segir að miklar breytingar séu framundan í starfsemi bankanna. Í dag eru mun fleiri sem nýta sér þjónustu í gegnum snjallsímaforrit bankans eða netið. Varðandi þjónustugjöldin segir Birna:

„Ég held að það sé bara mikilvægt að við séum að verðleggja þjónustuna rétt, þannig að það sé verið að borga fyrir hana það sem hún kostar, ég held að það sé þar sem við viljum vera.“

Aðspurð hvort það væri ekki svigrúm til þess að lækka þjónustugjöld til almennings í ljósi hagnaðarins svarar Birna:

„Ef þú horfir á arðsemina og eigið fé sem er búið að setja inn í bankann, þá erum við bara þar sem kröfurnar eru gerðar.“