Yfir 3.000 Toyota Mirai vetnisbílar seldir í Kaliforníu

Þó svo flestir standi í þeirri trú að rafmagnsbílar munu einir leysa af bíla með hefðbundnum brunavélum eru þó sumir á því að kostirnir verði fleiri, meðal annars vetnisbílar. Það virðast að minnsta kosti yfir 3.000 kaupendur Toyota Mirai vetnisbílsins taka undir vestur í Kaliforníu.

Toyota kynnti Mirai með vetnisdrifrás þar í október árið 2015 og honum hefur greinilega verið tekið vel í þessu fylki þar sem langflestir umhverfisvænir bílar seljast þar í landi. Sala Mirai í Bandaríkjunum nemur reyndar 80% af öllum vetnisbílum seldum í landinu öllu. Þessi ágæta sala Mirai er reyndar á pari við áætlanir Toyota sem sagði um mitt ár 2015 að það myndi selja um 3.000 Mirai bíla í Kaliforníu til loka árs 2017.

Drægni Mirai bílsins er 500 kílómetrar, eða um það bil það sama og í mörgum bílum sem ganga fyrir bensíni, svo drægnishræðsla ætti ekki að hræða frá kaupum. Það eru ekki nema 31 vetnishleðslustöð enn í Kaliforníu og til stendur að opna 12 nýjar á þessu ári. Ennfremur er Toyota í samstarfi við vetnisframleiðandann Air Liquide um uppsetningu á 12 öðrum stöðvum á svæðinu milli New York og Boston.

Það eru helst Toyota og Hyundai sem leiða þróunina á hagkvæmum og langdrægum vetnisbílum og stutt er í að Hyundai kynni nýjan Nexo vetnisbíl með 600 km drægni.