Annar sigur hjá Axel og Birgi

Birgir Leifur Hafþórsson og Axel Bóasson unnu annan leik sinn á EM í golfi sem fram fer á Gleneagles vellinum í Skotlandi.

Andstæðingar Birgis og Axels í dag voru þeir Guido Miglozzi og Lorenzo Gagli frá Ítalíu. Þeir töpuðu sínum fyrsta leik í gær á meðan Axel og Birgir unnu.

Á mótinu er keppt í fjórbolta í holukeppni. Þegar tíu holur voru búnar voru þeir ítölsku komnir með þriggja holu forystu. Þá settu Axel og Birgir hins vegar í næsta gír og þeir unnu næstu þrjár holur og jöfnuðu leikinn þegar fimm holur voru eftir.

Nokkuð jafnt var með þeim á næstu holum en svo fór að Axel og Birgir unnu 2&1, þeir voru með tveggja holu forystu fyrir síðustu holuna og þá var leiknum lokið.

Axel og Birgir eru því með fjögur stig eftir tvo leiki í D riðili. Hinum leik riðilsins er ekki lokið, þar eru Norðmennirnir og Belgarnir jafnir þegar tvær holur eru eftir þegar þessi frétt er skrifuð. Norðmennirnir voru með tvö stig fyrir daginn í dag en Belgarnir ekkert.

Efsta lið hvers riðils kemst áfram í undanúrslit, Axel og Birgir mæta Norðmönnunum á morgun í leik sem gæti orðið úrslitaleikur um sæti í undanúrslitunum.