Patrick Pedersen: Hugsa ekki um markametið heldur bara um að vinna deildina

Danski framherjinn Patrick Pedersen er nú kominn upp fyrir Hilmar Árna Halldórsson í baráttunni um markakóngstitilinn í Pepsideild karla og er farinn að nálgast markametið og 20 marka múrinn.

Patrick Pedersen skoraði þrennu í sigrinum á ÍBV á sunnudagskvöldið og er þar með kominn með 16 mörk í deildinni. Markametið er 19 mörk og það eiga nú fimm menn eftir að Andri Rúnar Bjarnason jafnaði það í fyrra.

Patrick Pedersen var hinsvegar átta mörkum á eftir Hilmari Árna Halldórssyni í lok júlí en hefur skorað 9 mörk á móti engu frá Hilmari Árna undanfarna 36 daga.

Ríkharð Óskar Guðnason hitti Patrick Pedersen og ræddi við Danann þar sem hann spurði hann meðal annars út í markametið.

„Ég held að þetta sé liðinu að þakka en ekki bara mér. Þegar liðið spilar vel þá spila ég vel. Mörkin eru að detta inn núna hjá mér og það er gott. Mikilvægast er samt að hafa náð í öll þrjú stigin í þessum leik,“ sagði Patrick Pedersen.

Valur á eftir útileik á móti FH og heimaleik á móti Keflavík í tveimur síðustu umferðunum. Patrick Pedersen þarf fjögur mörk til að bæta markametið og verða sá fyrsti til að skora tuttugu mörk í efstu deild á Íslandi. Er hann farinn að hugsa út í það?

„Nei, ég hugsa bara um deildina. Mikilvægast er að vinna deildina. Við sjáum síðan bara til hvers mörg mörk við höfum skorað við lok leiktíðarinnar,“ sagði Pedersen.

En eftir þetta flotta tímabil gæti Patrick Pedersen verið á leiðinni í erlent lið.

„Ég er leikmaður Vals í dag. Ég er hér og ætla ekki að fara neitt,“ sagði Patrick Pedersen.

Það má finna alla umfjöllununa um Patrick Pedersen í fréttum Stöðvar tvö í myndbandinu hér fyrir neðan.