Upphitun: Mercedes getur tryggt sér titil bílasmiða

Lewis Hamilton tryggði sér heimsmeistaratitilinn í Formúlu 1 í mexíkóska kappakstrinum fyrir tveimur vikum. Lið hans, Mercedes, getur tryggt sér titil bílasmiða um helgina er brasilíski kappaksturinn fer fram á Interlagos brautinni.

Brautin fær nafn sitt eftir hverfinu Interlagos í Sao Paulo og keppt hefur verið þar síðan 1972. McLaren er sigursælasta liðið í Brasilíu, þá aðalega þökk sé þeim Alain Prost og Ayrton Senna sem voru algjörlega óstöðvandi frá árunum 1985 til 1991.

Áhorfendurnir í Sao Paulo eru þeir allra ástríðufyllstu og er stemningin á brautinni algjörlega einstök. Veðrið hefur einnig oft spilað stóra rullu í Brasilíu þar sem erfitt er að spá fyrir um hvar og hvenær rignir.

Ennþá barátta um titil bílasmiða

Mercedes liðið er 55 stigum á undan Ferrari þegar tvær keppnir eru eftir. Því verður ítalska liðið að ná að minnsta kosti 12 stigum meira en Mercedes um helgina.

„Það er ekki nóg fyrir okkur að vinna bara ökumannstitilinn, við ætlum að vinna báða titla," sagði Toto Wolff, stjóri Mercedes, í vikunni. Hann bætti við að liðið er mjög ósátt með árangur sinn í Mexíkó og ætlar að bæta upp fyrir það um helgina.

Ferrari liðið hefur náð mjög góðum árangri í síðustu keppnum og er ljóst að bílar liðsins eru hraðari en bílar Mercedes um þessar mundir. Takist Ferrari að halda lífi í slagnum um titilinn myndi það setja mikla pressu á Mercedes fyrir lokakeppni tímabilsins.

Kappakstur helgarinnar, æfingar og tímatökur verða allt í beinni útsendingu á Stöð 2 Sport. Ræst verður af stað í kappaksturinn klukkan 17 á sunnudag.