Framleiðir chilli-sósu í Berufirði

Chilli-fíkillinn William Óðinn Lefever er þessa dagana önnum kafinn við að koma chilli-sósu á markað sem hefur fengið heitið Bera. Sósan er nefnd eftir tröllskessunni Beru sem réð ríkjum í Berufirði en þar hefur Óðinn komið sér fyrir á Karlsstöðum þar sem hjónin Berglind Häsler og Svavar Pétur Eysteinsson, betur þekktur sem Prins Póló, búa ásamt börnum og reka gistiheimili, tónleikastað, matstofu, snakkgerð og menningarstarfsemi undir merkjum Havarí.

Þegar Vísir náði tali af Óðni var hann að pilla dilka af habanero-piparnum sem hann notar í sósuna en hann áætlar að fyrsta upplag verði tilbúið á næstu dögum. Verður fyrsta upplagið um 360 lítrar af chilli-sósu sem er tappað á 2.400 150 millilítra flöskur.

Allt byrjaði þetta þegar Óðinn ákvað að elta þáverandi kærustu sína, sem í dag er unnusta hans, Gretu Mjöll Samúelsdóttur til Bandaríkjanna en þar hafði hún fengið styrk til náms í Northeastern-háskólanum gegn því að spila knattspyrnu.

Óðinn kláraði sitt háskólanám á Íslandi en fluttist svo út til Gretu þar sem hann gat sótt um vinnu því faðir hans er frá Bandaríkjunum og Óðinn því með tvöfalt ríkisfang.

Heill heimur af sósum

Þar kynntist hann „hot sauce“, eða sterkum sósum, fyrir alvöru.

„Ég vissi að þetta væri til, maður þekkti Tabasco-sósu en ég var ekki að kveikja á því að það væri heill heimur af þessum sósum og ótal tegundir til.“

Í Bandaríkjunum hafði hann aðgang að miklu úrvali og var farinn að setja chilli-sósu á nánast allan mat. Hann vingaðist við fólk sem deildi sömu ástríðu og hann á sterkum sósum og fékk í gegnum þau að skyggnast í slíka sósugerð.

Þegar Óðinn og Greta fluttu aftur til Íslands voru góð ráð dýr. Úrvalið af þessari tegund af sósum var ekki það besta og fór Óðinn því að reyna fyrir sér í sósugerðinni með afbragðs útkomu.

Greta hvatti hann til að sækja um

Árið 2015 ákváðu þau að venda kvæði sínu í kross og fluttust á Djúpavog á Austfjörðum. Greta bendir honum á að Uppbyggingarsjóður Austurlands hafi auglýst eftir umsóknum um styrki til nýsköpunar og hvetur hann til að sækja um í því skyni að búa til chilli-sósu.

„Ég var ekki á þeim buxunum fyrst um sinn. Ég er svo mikill bremsukarl. Svo hugsaði ég; af hverju ekki? og prófaði að sækja um.“

Umsókninni var vel tekið og þá var ekki aftur snúið og er Óðinn þakklátur fyrir það. Hann segir þetta breyta allri nálgun þegar kemur að sósugerðinni og það sé enginn afsláttur gefinn. Hann þarf reglulega að skila skýrslum um framgang mála sem geri honum gott og haldi honum við efnið.

„Það er ekki rými til að slugsa,“ segir Óðinn.

Fær hjálp frá mörgum

Þó svo að Óðinn sé einn í verkefninu að nafninu til segir hann það langt frá raunveruleikanum. Fjölmargir hafa lagt honum lið og voru til að mynda bróðir hans og vinkona að hjálpa til við sósugerðina þegar Vísir heyrði í honum.

„Og svo konan mín. Þetta hefði aldrei orðið að veruleika ef hún hefði ekki verið hérna til að leiða mig í gegnum þetta. Ég hefði aldrei geta gert þetta einn.“

Hann segist notast við eins mikið íslenskt hráefni og hægt er, en hráefnisöflunin sé fremur flókin þegar kemur að piparnum sjálfum.

Neyddist til að flytja piparinn inn

Óðinn notast við habanero-pipar sem er sem stendur ekki ræktaður á Íslandi í nógu miklu magni til að annast framleiðslu.

Habanero er mjög sterkur pipar sem rýkur ekki beint út líkt og heitar lummur einn og sér. Óðinn segir að á um það bil 10 til 15 kíló séu í umferð á Íslandi á hverjum gefnum tímapunkti og enginn garðyrkjubóndi myndi leggja það á sig að rækta svo lítið magn.

Óðinn þarf hins vegar 28 kíló af Habanero-pipar í hvern skammt og því dugði lítið annað en að flytja það inn. Hann hefur þó komist í kynni við bónda sem er einnig forfallinn chilli-fíkill sem fylgist spenntur með gangi mála. Ef salan á sósunni gengur vel verður farið í að skoða möguleika á ræktun. Habanero er eitt alsterkasta chilialdinið sem telst raunar til sérstakra tegundar chillialdina, Capsicum sinense.

Hann notar jafnframt ferskan mangó í sósuna sem er ekki til í miklu magni á Íslandi, því þarf einnig að flytja það inn. Hann segist hafa lært margt á ferlinu og með tíð og tíma muni hann finna lausnir á öllum þeim vandamálum sem hafa komið upp við að finna alíslenskt hráefni í sósuna.

Tvöfaldur styrkur Tabasco-sósunnar

Sósunni er ætlað að keyra bragðlaukana í gang, sem verður tvöfalt sterkari en Tabasco-sósa.

„Styrkur sósa af þessari tegund falla á mjög breiðan skala. Smekkur fólks og þol fyrir styrk er afar mismunandi og því er erfitt að áætla hversu sterk sósan er. Til er ákveðinn skali sem mælir styrkleika eftir kvarða sem er kenndur við Scoville. Sem dæmi skorar Tabasco um það bil 3500 einingar á þeim skala. Ég hef ekki látið mæla Scoville-einingarnar í Beru en áætla að hún skori á bilinu 7-9000 á skalanum. Þetta er vissulega sterkt en ætti ekki að eyðileggja daginn fyrir neinum. Fyrst og fremst er þetta frábær viðbót við flesta rétti og keyrir bragðlaukana í gang!“

Hann ætlar sér á næstu dögum að klára að koma sósunni á flöskur og merkja þær, því næst verður farið í markaðssetningu og reynt að finna söluaðila.

Hann hefur einnig fengið samþykki frá forsvarsmönnum hópfjármögnunarsíðunnar Karolina fund um að koma verkefninu sínu þangað inn. Þar ætlar hann að selja sósuna til fólks fyrir fram og ætlar að nýta fjármagnið til að styrkja framleiðsluna og stækka við sig.