Hækkun framlaga stjórnvalda til UNICEF 160% milli ára

Framlög íslenskra stjórnvalda, almennings og fyrirtækja á Íslandi til Barnahjálpar Sameinuðu þjóðanna (UNICEF) hafa aldrei verið hærri en á síðasta ári. Á ársfundi landsnefndar UNICEF í gær kom fram að vöxturinn milli ára hafi verið 10,2% og hækkun framlaga frá íslenskum stjórnvöldum á milli áranna 2017 og 2018 hafi sjaldan verið meiri, eða tæp 160%. Árið 2018 komu næst hæstu framlögin til UNICEF frá Íslandi miðað við höfðatölu, aðeins hlutur Norðmanna var hærri.

„Þetta er alveg frábær árangur og við erum almenningi, fyrirtækjum og stjórnvöldum innilega þakklát fyrir þennan mikilvæga stuðning. Það er auðvitað mjög gleðilegt að sjá þessi auknu framlög frá ríkinu til baráttu UNICEF alþjóðlega, og þessi aukning gerir UNICEF kleift að ná til enn fleiri barna um allan heim,“ segir Bergsteinn Jónsson, framkvæmdastjóri UNICEF á Íslandi.

Metár hjá UNICEF á Íslandi

Á fundinum í dag kynnti Bergsteinn helstu niðurstöður ársins 2018. Þar bar einna hæst að söfnunarfé UNICEF á Íslandi var rúmar 730 milljónir króna árið 2018, sem er 10,2% vöxtur milli ára. Alls kom 81% af söfnunarfé frá heimsforeldrum, mánaðarlegum stuðningsaðilum sem styðja baráttu UNICEF um allan heim. Auk þess studdi almenningur dyggilega við börn í Jemen á árinu, en rétt tæplega 30 milljónir söfnuðust fyrir neyðarhjálp UNICEF í Jemen. Metsala var síðan á sölum „Sannra gjafa“ fyrir jólin, en landsmenn keyptu hjálpargögn á borð við bóluefni, teppi, hlý föt og vatnsdælur fyrir rúmlega 30 milljónir króna á árinu.

Nýr formaður stjórnar

Á aðalfundi UNICEF tók Kjartan Örn Ólafsson við sem nýr stjórnarformaður af Ernu Kristínu Blöndal sem hefur gegnt embættinu frá árinu 2018. Erna Kristín, sem gegnir nú stöðu skrifstofustjóra barna- og fjölskyldumála í  félagsmálaráðuneytinu, situr áfram í stjórn. Aðrir stjórnarmenn eru Guðrún Hálfdánardóttir, varaformaður, Guðrún Nordal, Svafa Grönfeldt, Sigríður Thorlacius og Styrmir Gunnarsson. Lilja Hrund Ava Lúðvíksdóttir og Jökull Ingi Þorvaldsson eru fulltrúar ungmennaráðs.

Ársskýrsla UNICEF á Íslandi



Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.