Pétur Viðarsson hættur

Pétur Viðarsson, knattspyrnumaður í FH, er hættur knattspyrnuiðkun en þetta staðfesti hann í samtali við Guðmund Hilmarsson á Morgunblaðinu í dag.

Pétur, sem er fæddur árið 1987, lék sinn fyrsta leik fyrir meistaraflokk FH árið 2006 og hefur síðan þá verið mikilvægur hluti af FH-liðinu.

Pétur hefur unnið fimm Íslandsmeistaratitla og einn bikarmeistaratitil en en leikirnir í meistaraflokki urðu 250. Hann skoraði í þeim tólf mörk.

„Þetta er búið að blunda í mér og ég held að þetta sé bara orðið gott. Þetta er bú­inn að vera ótrú­lega skemmti­leg­ur tími og frá­bær for­rétt­indi að fá að spila fyr­ir þenn­an klúbb og taka þátt í vel­gengn­inni sem hef­ur verið hjá fé­lag­inu,“ sagði Pét­ur í sam­tali við Morgunblaðið.

„Ég hef fengið að taka þátt í ótrú­legu æv­in­týri, Evr­ópu­ferðirn­ar all­ar og vinna marga titla með liðinu. Mér finnst eins og ég sé ný­byrjaður og fyndið að ég sé bú­inn að taka tólf tíma­bil með FH.“

Pétur er orðinn pulsusali en hann rekur einn elsta veitingastað í Hafnarfirði, Pylsubarinn, en hann hefur nú stýrt þar ferðinni í tæplega eitt og hálft ár.

„Ég held að þetta sé rétti punkt­ur­inn að hætta. Ég gæti vel haldið áfram að spila en nú eru aðrir hlut­ir í for­gangi hjá mér og það taka bara ein­hverj­ir aðrir við og leysa mig af hólmi. Ég skil mjög sátt­ur við fer­il­inn og er þakk­lát­ur öllu því fólki sem ég hef kynnst á þess­um tíma og ekki síst liðsfé­lög­un­um í öll þessi ár. Þetta er búið að vera ótrú­lega skemmti­legt og það er alls ekki sjálf­gefið að taka þátt í vel­gengni eins og hef­ur verið hjá FH,“ sagði Pét­ur.