Tveir laxar á land við opnun í Hrútafjarðará

Hrútafjarðará opnaði fyrir tveimur dögum og fyrstu fréttir úr ánni eru góðar enda aðstæður til veiða alveg ágætar.

Það veiddust tvær vænar hrygnur sem voru mældar 82 og 83 sm og það var hinn góðkunni veiðimaður og laxahvíslari Nils Jörgensen sem fékk þær báðar, aðra í  veiðistaðnum Stokk og hina í Bálk. Lax sást á nokkrum stöðum og töluvert af bleikju lá í neðstu veiðistöðunum eins og venjulega á þessum tíma. Aðstæður við ánna eru fínar en það hefur verið frekar mikið vatn í ánni eins og öðrum ám á norðurlandi enda snjóalög mikil ennþá þrátt fyrir að lítið sé eftir af júnímánuði. Áin er þó að sjatna rólega og fer að detta í kjörvatn sem gæti ekki verið betri tímasetning þar sem það er stórstreymt á morgun.