Arion Banki selur skuldabréf fyrir 300 milljónir evra til 3,5 ára

Arion banki seldi í dag skuldabréf til fimm ára að upphæð 300 milljónir evra eða sem nemur rúmum 48,6 milljörðum íslenskra króna. Þetta kemur fram í tilkynningu frá bankanum. 

Þar segir að umframeftirspurn hafi verið eftir skuldabréfunum en í heild bárust tilboð frá ríflega 54 fjárfestum fyrir um 500 milljónir evra. Skuldabréfin voru seld á kjörum sem jafngilda 1,15% álagi á millibankavexti.

„Mikil eftirspurn frá skuldabréfafjárfestum á meginlandi Evrópu og ekki síst frá suður Evrópu eykur fjölbreytni alþjóðlegra fjárfesta í Arion banka. Þessi vel heppnaða skuldabréfaútgáfa sýnir vel hve sterkur efnahagsreikningur bankans og eiginfjárstaða er,“ segir í tilkynningunni.

Deutsche Bank, J.P. Morgan plc, Nomura International plc og UBS Europe SE sáu um útgáfuna fyrir hönd bankans.